vegalög.

Frú forseti. Ég þakka hv. þm. Norðvesturkjördæmis, Ólafi Adolfssyni, fyrir þessar spurningar. Í fyrsta lagi varðandi kostnað. Ég geri ráð fyrir að þingmaðurinn vilji fá að vita hvaða kostnaður fylgi samþykkt frumvarpsins, ef ég skil rétt. Eins og ég sagði í minni ræðu þá tel ég að í upphafi, ef þetta yrði samþykkt í dag, þá væri enginn kostnaður kominn á þetta ári seinna, enginn kostnaður. Þetta leggur raunverulega skyldu á yfirvöld, þ.e. samgönguyfirvöld, til þess að skipuleggja þessar ferjusiglingar, hafa um þær skýra stefnu og skylda þau til þess sem ekki er í dag. Þetta er bara svona hipsum haps eins og við sjáum á því þegar Herjólfur bilaði eða fór í slipp. Reyndar var Baldur tekinn í staðinn. Og hvað hafa þá íbúar við Breiðafjörð á meðan? Kannski ekki neitt? Þetta setur skýra skyldu á stjórnvöld og farvegurinn fyrir þessi mál verður miklu skýrari og skilvirkari fyrir vikið og kastljósinu verður beint betur að ferjusiglingum, tel ég, vegna þess að það verður litið á þetta eins og þjóðveg og það þarf að halda þjóðvegum opnum. Þá er spurningin: Hversu mikið ætlarðu að halda honum opnum? Ætlarðu að moka til Hólmavíkur tvisvar í viku eða fimm sinnum í viku? Það sama á þá við um Grímsey og Hrísey og Flatey og allar þessar eyjar. Hvað hyggst ríkið bjóða upp á margar ferðir og til hve langs tíma? Þá geta íbúarnir gert sér grein fyrir því. En ekki að þetta sé hipsum haps, eins og einhver sagði einhvern tímann, og að þetta sé bara eftir fjárhag og getu og skipi og möguleikum. En það er bara gaman að þessi umræða skuli hafa dregist í hinar og þessar áttir og ég fagna því.