Staða hafrannsókna.

Virðulegi forseti. Ég vil í upphafi þakka hv. þm. Sigurjóni Þórðarsyni fyrir að vekja máls á þessu mikilvæga umræðuefni. Hafrannsóknastofnun gegnir lykilhlutverki í sjálfbærri nýtingu auðlinda hafsins. Vísindaleg þekking stofnunarinnar, byggð á áratugarannsóknum og gagnasöfnun, er grundvöllur ákvarðana stjórnvalda. Samkvæmt 3. gr. laga um stjórn fiskveiða ber ráðherra að ákveða leyfilegan heildarafla að fengnum tillögum Hafró, sem undirstrikar mikilvægi stofnunarinnar og faglegs mats hennar. Virðing fyrir vísindum og traustum gögnum er því forsenda trúverðugleika fiskveiðistjórnar en jafnframt er mikilvægt að viðurkenna að rannsóknarumhverfið er síbreytilegt og kallar á sveigjanleika. Lögin banna ekki ráðherra að leita einnig til annarra sérfræðinga þegar aðstæður gera slíkt nauðsynlegt og mikilvægt er að sé sú leið farin sé það til að víkka þekkingargrunninn við fyrirliggjandi faglegt mat enda getur það stuðlað að betri heildarsýn. Hafrannsóknir byggjast á öflugum innviðum, réttum tækjabúnaði, rekstrarfærum skipum, mannafla og fjármagni. Það er gríðarlega mikilvægt að til staðar sé réttur búnaður til að afla gagna og bregðast við breytingum í vistkerfi hafsins. Því er mikilvægt að tryggja áframhaldandi fjárfestingu í tækni, innviðum og nýsköpun þannig að rannsóknir mæti bæði nútímakröfum og framtíðarþörfum. Vert er að minnast á það hér að í skýrslu um stöðu hafrannsókna, sem unnin var á síðasta kjörtímabili, var minnst á að mikilvægasta áskorun haf- og fiskirannsókna á komandi árum væru rannsóknir á eðli loftslagsbreytinga og áhrif þeirra á hafið og lífríki þess, og þar með fyrir íslenskan sjávarútveg. Með því að styðjast við faglega ráðgjöf byggjum við sterkara og traustara kerfi.