Staða hafrannsókna.

Virðulegi forseti. Ég þakka fyrir þessa góðu umræðu og tek undir með fleirum að tíminn til hennar er náttúrlega allt of stuttur. Við þurfum að ræða þetta mun meira og ofan í grunninn. Eitt af stóru hlutverkum Hafrannsóknastofnunar er stuðningur við sjálfbæra nýtingu sem gengur náttúrlega út á það að reyna að vernda þá fiskstofna sem hér eru. Þá þurfum við að byggja það mat á vísindalegum gögnum, vissulega eru þau til og þau hafa verið gagnrýnd. Hvað hefur áhrif á þann breytileika sem er á fiskstofnum, t.d. á nýliðun á þorski, sömuleiðis breytta göngu á þorski? Við þekkjum það að hér fyrir 20, 30 árum síðan var sáralítill og frekar lélegur þorskur fyrir Norðurlandi. Núna er það gjörbreytt. Núna er það boldangsþorskur í stórum stíl. Hvers vegna er það? Því hefur ekki verið svarað. Við horfum alltaf á heildarmyndina en ég held að það sé mjög mikilvægt í þessu samhengi að við leggjum allt okkar traust á Hafrannsóknastofnun og ef stofnunin á að geta staðið undir nafni þá þurfum við líka að styðja hana. Við þurfum að styðja hana með auknum fjárframlögum, það þarf að efla rannsóknir og sömuleiðis verðum við kannski að horfa á aðrar rannsóknir, fá fleiri aðila að borðinu með mismunandi skoðanir, því að ég held að það sé engin skoðun réttari eða rétthærri í því þegar kemur að því að meta það hvað er í sjó. Ég held að það sé stóri þátturinn í þessu.

Mér finnst áhugaverðar þær hugmyndir sem hv. þingmaður og málshefjandi, Sigurjón Þórðarson, setur hér fram varðandi tilraunaveiðar í Grímsey og Ísafjarðardjúpi. Ég held að þetta sé hluti af því sem við þurfum að styðja Hafrannsóknastofnun í fyrst og fremst (Forseti hringir.) vegna þess að hlutverkið er það að auka arðsemina af sameiginlegri auðlind þjóðarinnar.