áhrif skattkerfisbreytinga.

Forseti. Ég þakka Vilhjálmi Árnasyni fyrir spurninguna. Nú er auðvitað dálítið sérstakt að halda því fram að um hækkun á erfðafjárskatti sé að ræða þegar frumvarpið snýst einungis um það að fara enn þá lengra með það viðmið sem þó gildir í öllu uppgjöri dánarbúa á Íslandi, sem er að miða við markaðsvirði eigna. Raunar er það eina verðið sem hægt er að miða við þegar fjallað er um eignasölu. Við erum með ágæta mælingu á væntu söluvirði fasteigna. Húsnæðis- og mannvirkjastofnun heldur utan um fasteignamat, sem er auðvitað grundvallarfyrirbæri og notað í margs konar tilgangi. Fasteignamat endurspeglar markaðsverð. Sambærileg viðmið er erfiðara að búa til fyrir land og þetta veldur auðvitað ákveðnum vandamálum við mat á virði lands. En ég get ekki séð að það fasteignamat sem viðurkennt er að endurspegli ekki virði lands og að miða frekar við markaðsverð í ljósi þess að land á Íslandi gengur kaupum og sölum á hverju einasta ári sé flækjustig fyrir sýslumenn, né heldur það sem snýr að mati á virði óskráðra fyrirtækja. Raunar má segja að hér sé um mikla einföldun að ræða á því regluverki sem sett var árið 2007 og notað er í dag við mat sambærilegra eigna.