fjárlög 2026.
Forseti. Ég þakka spurninguna. Þetta er rétt, reyndar er það eiginlega verra, þau gera ekki einu sinni ráð fyrir auknum tekjum af þessu, þau komu alla vega með það núna, heldur á það að koma í gegnum erfðafjárskattinn af því að fleiri deyja og okkur fjölgar eða eitthvað svona, stutta lýsingin, og fleiri eru að greiða fyrirframgreiddan arf. En það er galli á þessu vegna þess að þetta mun hækka verulega erfðafjárskatt, og það hefur komið fram til að mynda í umsögnum frá KPMG, Deloitte og öðrum, þannig að það er galli. Við erum búin að ræða þetta mikið í efnahags- og viðskiptanefnd og það er galli á málinu að það er ekkert mat á hversu mikið skattarnir hækka við þetta. Svo er eiginlega allt annað í þessu máli gallað. Varðandi óefnislegu eignirnar, það er svolítið búið að koma inn á það. Það er líka svolítið ágæt leið þegar við erum að tala um til að mynda að það eigi að meta eitthvað í fyrirtækjum, ég hef heyrt talað um þetta með hugverkaréttindin en þetta er svo flókið að það verður ógerningur að fylgja þessu eftir. Ef þú til að mynda erfir 5% hlut í fyrirtæki, þú ert bara minnihlutaeigandi, aðrir eiga 95%, þá segir að þú eigir að meta eignir inni í fyrirtækinu öðruvísi en gert er samkvæmt bókhaldi. Í fyrsta lagi hefurðu engan aðgang að bókhaldsgögnum þannig að þú getur ekki gert það og ef þú gætir gert það með einhverjum hætti þá er þessi 5% eigandi kominn með allt annað mat á virði fyrirtækisins en 95%, eitthvað miklu hærra mat en aðrir eigendur þannig að þetta er bara eiginlega galið.
