breyting á ýmsum lögum vegna fjárlaga 2026.

Virðulegi forseti. Ég þakka hv. þingmanni fyrir spurninguna. Það var hér áðan í skoðanaskiptum og andsvörum á milli hv. þm. Stefáns Vagns Stefánssonar og hv. þm. Örnu Láru Jónsdóttur sem kratakryddið kom upp, umræða um það. Nú vill þannig til að sá sem hér stendur er með ofnæmi fyrir ýmsum kryddum. Ég hef að vísu ekki farið í ofnæmispróf hvað varðar kratakryddið.

En spurningin sneri að uppbyggingu innviða og það sem ég átti við með því er það að þegar kemur að raforkuöryggi í hinum dreifðu byggðum og flutningsgetu rafmagns þá er það þannig með þessi stóru tæki eins og dráttarvélar og vörubíla að það þarf að vera með alveg gríðarlega mikla spennu til þess að það sé hægt að hlaða þá á stuttum tíma. Það eru til rafvæddar dráttarvélar erlendis. Þær þurfa gríðarlega hleðslu og eru líka mjög fljótar að tapa þeirri hleðslu sem fyrir er vegna þess að aflið er svo gríðarlega mikið sem fer þarna í gegn. Það sem ég á við með uppbyggingu innviða er að við þurfum náttúrlega að horfa til þess að það sé nægur flutningur. Það hefur hingað til ekki verið réttlætanlegt, meira að segja t.d. þrátt fyrir að við séum með loðnubræðslu eða síldarbræðslu á endanum, t.d. varðandi Þórshöfn, það hefur hingað til ekki verið talið forsvaranlegt að leggja þangað háspenntan streng almennilega til að þjónusta þá verksmiðju, og hvað þá ef við ætluðum að vera með þessa miklu flutningsgetu bara til þess að hlaða eina og eina dráttarvél hingað og þangað um allar sveitir landsins. Það segir sig sjálft að við erum ekki komin þangað. Við björgum því ekki með því að nota meira af kratakryddi sem eru skattahækkanir.