breyting á ýmsum lögum vegna fjárlaga 2026.
Virðulegur forseti. Ég held að það sé nokkuð augljóst og rétt hjá hv. þm. Bryndísi Haraldsdóttur að þetta ítarlega minnisblað hefði auðvitað átt að koma hingað inn sem frumvarp, hvort sem menn hefðu viljað kalla það bandorm III eða ekki. Þetta er svo sem ekki bandormur, og þó, þetta varðar mjög marga og ólíka þætti vörugjaldanna. Eða að þetta hefði átt að koma sem frumvarp um hækkun á vörugjöldum og ráðherrann hefði þá þurft að standa fyrir því. Auðvitað er þetta stundum gert, að fela nefndum að lagfæra eitthvað sem ráðuneytunum hefur yfirsést eða ef eitthvað hefur komið upp á sem menn höfðu ekki séð fyrir í tíma. En þetta umfang er miklu stærra, hér erum við að tala um 7,5 milljarða. Hefði til að mynda ríkisstjórnin haldið blaðamannafund, sem hún gerir gjarnan, 17. október og kynnt hvað hún væri að fara að gera þá hefði kannski athyglin komið á þetta þar. En ég bendi á að breytingin í hegðun þeirra sem eru að kaupa bíla kemur í kjölfarið á því að það fer að kvisast út eftir að minnisblaðið kemur. Breytingin í sölu bíla er umtalsverð í nóvember og desember eftir að það fréttist af þessu minnisblaði en þetta hefði getað legið fyrir sem frumvarp í september eða byrjun október, verið kynnt þá og menn bara rætt það opinskátt. Það var eins og það væri verið að fara með þetta í einhverjar felur, 7,5 milljarða. Þegar við höfum bent á að það sé ólíklegt að tekjuhlið þessara breytinga, upp á 7,5 milljarða, standist þá segir ráðuneytið, að mér skilst, við nefndina: Nei, við ætlum ekki að endurmeta þessar tekjur. Þetta er bara áætlun og það eru svo miklar sveiflur í sölu á bílum. Já, ég hugsa að það séu umtalsverðar sveiflur í sölu á bílum og við höfum séð það á liðnum árum. Þær verða ekki minni við þessa breytingu því að það er augljóst að margir munu kaupa sér bíla í nóvember og desember á þessu ári og þeir kaupa þá ekki aftur á næsta ári og þær tekjur skila sér þar af leiðandi ekki inn í tekjuáætlun fjárlaga 2026.
