breyting á ýmsum lögum vegna fjárlaga 2026.

Virðulegi forseti. Að sjálfsögðu styðjum við þessa skattalækkun hér sem er nauðsynleg. Það er alveg rétt að það voru gerð mistök þegar fjárlögin og bandormurinn voru kláruð síðast í starfsstjórninni, en það var reynt ýmislegt til að koma í veg fyrir að þurfa að samþykkja þessar tillögur þá, eins og að auka almenna hagræðingu í kerfinu, en það var bara enginn stuðningur við það í fjárlaganefnd sem var hálfgerð þjóðstjórn eins og við kláruðum fjárlögin og bandorminn síðast. En það sem verra er er að nánast allar aðrar skattahækkanir sem hafa verið til umræðu í dag og eiga eftir að vera í umræðu í næstu bandormum hafa ekki bara sömu vondu áhrifin af þessu heldur í miklu stærra mæli af því að þær eru miklu víðtækari en þessi. Því er ótrúlegt að sjá að ríkisstjórnin skilji vanda skattlagningar í þessu máli en ekki í öllum hinum. Þetta munu vera sömu afleiðingarnar og munið það, hæstv. ríkisstjórn, að ári liðnu þegar samdrátturinn (Forseti hringir.) í ferðaþjónustunni verður orðinn algjör og ég verð að fá að segja það að mér brá að heyra hvernig hæstv. forsætisráðherra talaði niður ferðaþjónustuna í Silfrinu í gær. (Gripið fram í: Heyr, heyr.)