samgönguáætlun fyrir árin 2026--2040 ásamt fimm ára aðgerðaáætlun fyrir árin 2026--2030.

Virðulegur forseti. Varðandi samráð, eins og kom fram í ræðu minni þegar ég mælti fyrir tillögunni rétt áðan, þá byggir áætlunin á stefnumótunarferli sem hófst í byrjun árs 2021 og endaði með íbúafundum í ágúst 2025. Það var gefin út grænbók, það var gefin út hvítbók, þetta er búið að vera gríðarlega langt ferli. Eitt sem er líka gríðarlega mikilvægt er að þessi samgönguáætlunin sem hér er til umræðu byggir að mörgu leyti á síðustu tillögu til samgönguáætlunar frá árinu 2023, fyrir þremur árum síðan. Hún náði ekki fram að ganga en hún var sett í samráð. Þar komu athugasemdir frá almenningi í samráðsgátt um mikið af þeim hlutum sem eru núna í tillögunni, sömu atriði. Hún byggir að miklu leyti á þessari tillögu. Það má líka spyrja sig: Hversu oft eigum við að setja sama hlutinn í samráð? Það er búið að setja stóran hluta af þeim tillögum sem hér eru í þingsályktunartillögu um samgönguáætlun í samráð.

Hver eru stóru málin sem hér eru undir? Það er forgangsröðun í jarðgangaáætlun, henni er breytt. Það er risamál, við erum með aðra forgangsröðun. Það er einfalt mál, við setjum Fljótagöng í 1. sæti, ekki Fjarðarheiðargöng. Við setjum Fjarðagöng í 2. sæti, Súðavíkurgöng í 3. sætið og svo í 4. sæti eru Miklidalur og Hálfdán. Það eru stóru málin, stóru fréttirnar. Að öðru leyti eru þetta að miklu leyti framkvæmdatöflur sem lúta að fyrsta tímabili og það tímabil er fullfjármagnað. Ég get ekki séð það að samráð hafi skipt einhverjum sköpum og að þingið geti ekki afgreitt þetta mál með góðu móti nú á vorþingi af því að málið er svo stórt. Það er bara ekki rétt, það er ekki sannleikanum samkvæmt. Það er algjörlega undir hv. umhverfis- og samgöngunefnd sjálfri komið hvort hún framlengir umsagnarfrestinn eða ekki.

Stóru málin í þessari samgönguáætlun eru tiltölulega einföld. Þetta er bundið við fjármálaáætlun af því það þarf að fjármagna framkvæmdirnar. Við ætlum líka að fjármagna jarðgangaáætlun, það gerum við með innviðafélagi. Fyrri samgönguáætlanir hafa að miklu leyti verið óskalistar. Ég hafna því sem kom fram í umræðu hér áðan að þingið gæti átt í erfiðleikum með að afgreiða þetta mál nú á vorþingi. Þetta er bara eitt af mörgum málum sem eru til afgreiðslu á vorþingi og ef það er ekki hægt að afgreiða þetta mál þá þarf að fara að endurskoða algjörlega vinnubrögðin hérna á þingi. Það er ekki hægt að ætlast til þess að að svona mál eins og þetta hér sem lýtur að framkvæmdum — við stefnum á að fara í framkvæmdir strax á næsta ári varðandi Fljótagöng og að byrja að bora sennilega á seinni hluta næsta árs. Þá er ekki hægt að segja: Nei, við getum það ekki af því að þingið afgreiddi ekki samgönguáætlun á vorþingi 2026.

Ég tel að málið sé búið að fara í gegnum þetta lýðræðislega ferli sem ég lýsti. Því lauk með vel sóttum innviðafundum í öllum landshlutum, það var mikill áhugi, ekki síst fyrir austan, gríðarlega skemmtilegur og góður fundur. Það var mikill áhugi alls staðar um land og það er gríðarlega mikill áhugi á innviðauppbyggingu og vegasamgöngum um allt land, alls staðar, líka á höfuðborgarsvæðinu. Það er gríðarlega mikil þörf líka á höfuðborgarsvæðinu. Við höfum verið að eyða 0,5% af þjóðarframleiðslu í samgöngumál. Það er allt of lítið. Við ætlum að gera stórátak hvað það varðar. Ég get ekki séð að almenningur sem hefur áhuga á að koma athugasemdum geti ekki gert það á fjórum vikum. (Gripið fram í.) Fimm vikum, fyrirgefið. Ég læt það algerlega í hendur nefndarinnar að gera það. Ég bara hvet hv. þingmann til að hvetja þá sem hafa áhuga, sveitarfélög og hagaðila, að skila inn góðum umsögnum. Það verður gaman að sjá þær og fylgjast með þeirri umræðu sem þar kemur.