stöðugleikaregla.

Frú forseti. Ég fagna því að við séum að eiga þessa umræðu hér u.þ.b. ári eftir að stöðugleikareglan var innleidd í lög um opinber fjármál og þá er náttúrlega gott að við eigum umræðu um hvernig árangurinn hefur verið hingað til og hver reynslan er enn sem komið er. Ég hjó eftir því að hv. þm. Nanna Margrét Gunnlaugsdóttir fyrirspyrjandi talaði um að hér hefði ríkt samstaða þegar stöðugleikareglan var í þinglegri meðferð. Ég man ekki alveg eftir því svoleiðis. Þegar stöðugleikareglan kom til endanlegrar atkvæðagreiðslu þá greiddu til að mynda þingmenn Sjálfstæðisflokks og Framsóknarflokks atkvæði gegn frumvarpinu. Hv. þingmenn Miðflokksins sátu vissulega hjá þannig að þeir lögðust ekki gegn því að stöðugleikareglan yrði innleidd, ólíkt þingmönnum hinna stjórnarandstöðuflokkanna.

En svo vil ég líka minna á að það kom fram hér um daginn þegar Fitch hækkaði lánshæfismat ríkissjóðs úr A í A+, að það var sérstaklega tekið fram í greinargerðinni þar sem fjallað var um horfur í ríkisfjármálum, með leyfi forseta: Við gerum ráð fyrir því að hallinn dragist enn frekar saman á árinu 2026–2027 sem er stutt af stöðugleikareglunni sem takmarkar raunvöxt útgjalda. (Forseti hringir.) Þannig að það var þáttur í því að við fengum þetta bætta lánshæfismat og ég þakka þingmönnum Sjálfstæðisflokks og Framsóknarflokks kærlega fyrir sitt framlag í því.