veiðar í fiskveiðilandhelgi Íslands og stjórn fiskveiða.

Virðulegur forseti. Það hefur komið fram að verð á afurðum í hrognkelsaveiðum var hærra að meðaltali áður en þessi löggjöf sem nú er í gildi var sett svo ég tel að markaðirnir ráði miklu um það hvernig verð eru (BergÓ: Öllu. )og það sé ekki spurning um hvort það sé sóknardagakerfi eða aflamarkskerfi, því að markaðarnir stýra því og þeir sem stunda þessar veiðar lengi hafa stillt líka sóknina eftir því hvernig markaðirnir eru. Menn hafa unnið saman í þeim efnum, líka þjóðirnar hérna í kringum okkur, Grænlendingar og fleiri, svo ég tel að menn geri það áfram og stýri inn á það þegar best verð er á mörkuðum. Þeir hafa gert það í dagakerfinu og munu gera það áfram. Varðandi það hversu mikið fæst á hverja sóknareiningu, (Gripið fram í.) — ég tel að það sem hv. þingmaður virðist vera að fiska eftir sé hvort fáir geti grætt meira eða fleiri hafi tekjur af þessu. Ég sé fyrir mér að miklu fleiri hafi tekjur af þessu kerfi ef við breytum því í dagakerfi, frekar en að færri myndu hafa tekjur af þessu og eflaust meiri. Ég er hlynnt því að það hafi fleiri tekjur af þessu og geti stundað þessar veiðar með annarri atvinnu, svo sem strandveiðum og annarri atvinnu sem til fellur. Þetta hafa líka verið útgerðir frá ýmsum bændabýlum í gegnum árin, ég nefni t.d. Barðaströnd, svo að það hefur verið styrkur að geta stundað þessar veiðar með annarri vinnu vítt og breitt um landið og þannig vil ég sjá þetta áfram.