Störf þingsins.
Frú forseti. Það er sorglegt að hlusta á fulltrúa kaþólsku kirkjunnar á Íslandi tjá sig með þeim hætti sem við höfum heyrt á síðustu dögum um samkynhneigð. En við skulum hafa eitt alveg á hreinu. Á Íslandi gilda íslensk lög samþykkt af Alþingi Íslendinga. Hér gilda ekki lög kaþólsku kirkjunnar, ekki frekari reglur annarra trúfélaga, hvort sem það eru múslimar, vottar Jehóva eða aðrir. Við búum í lýðræðis- og réttarríki þar sem lögin eru sett af kjörnum fulltrúum þjóðarinnar og gilda jafnt fyrir alla. Á Íslandi ríkir trúfrelsi og fólk má aðhyllast hvaða trú sem er eða enga, en trúfrelsi þýðir ekki að trúarlegar reglur gangi framar íslenskum lögum eða réttindum borgaranna. Ísland hefur náð langt í jafnréttisbaráttunni og horft er til okkar víða um heim. Þegar við tölum um jafnrétti eigum við ekki aðeins við jafnrétti kynjanna heldur jafnrétti allra óháð kynhneigð, kynvitund, uppruna eða öðrum þáttum.
Stefna míns flokks byggir á mannréttindum, frelsi og ábyrgð einstaklingsins. Allir eiga að njóta mannréttinda án tillits til uppruna, trúar, kynhneigðar eða annarrar stöðu. Þess vegna höfum við líka lagt áherslu á að Ísland sé í fremstu röð í málefnum hinsegin fólks. Við viljum tryggja að einstaklingarnir njóti líkamlegrar friðhelgi og jafnréttis fyrir lögum óháð kynhneigð, kynvitund, kyneinkennum eða kyntjáningu. En um þessi gildi verðum við að standa vörð. Þau eru ekki sjálfsögð. Þess vegna megum við aldrei gefa eftir þegar kemur að mannréttindum og jafnrétti. Á Íslandi gilda íslensk lög. Hér eru engin önnur lög æðri, hvorki lög kaþólsku kirkjunnar, sjaríalög eða reglur annarra trúfélaga. Við búum í frjálsu samfélagi þar sem mannréttindi, jafnrétti og virðing fyrir fjölbreytileikanum er grunnurinn og við verðum að tryggja það áfram. (Gripið fram í: Heyr, heyr.)
