þjóðaratkvæðagreiðsla um framhald viðræðna um aðild Íslands að Evrópusambandinu.

Virðulegur forseti. Ég þakka hv. þm. Sigurði Helga Pálmasyni fyrir hans ræðu hér áðan. Þar sem hv. þingmaður er varaformaður utanríkismálanefndar og fulltrúi þess flokks í ríkisstjórn Íslands sem hefur það að yfirlýstri stefnu að vilja ekki að Ísland gangi inn í Evrópusambandið, þá hvet ég hann til dáða til að gæta að því að fylla duglega í upplýsingarnar sem sárlega vantar í þá þingsályktunartillögu sem hér er til meðferðar. Þar vantar í raun og veru allar upplýsingar svo borgararnir í þessu landi geti tekið upplýsta ákvörðun. En ég vil spyrja þingmanninn að því, í ljósi þeirrar eindregnu stefnu hans flokks varðandi aðild að Evrópusambandinu, hvort hann upplifi ekki þetta ferli sem hann stendur í núna sem svik við kjósendur síns flokks?