aðgerðir stjórnvalda varðandi verðbólgumarkmið og kjarasamninga.

Virðulegi forseti. Staðan í efnahagsmálum er grafalvarleg. Stýrivextir voru hækkaðir á ný í síðustu viku, verðbólgan er enn 5,2%, rúmlega tvöfalt yfir markmiði Seðlabanka Íslands og það sem verra er, nú blasir við að traustið sem þurfti að byggja upp í kringum kjarasamningana er brostið. Það sem fólk úti í samfélaginu sér er mjög einfalt: Seðlabankinn er einn í baráttunni, hann hækkar vexti, heimilin borga, fyrirtækin borga og allir tapa. En ríkisstjórnin hagar sér eins og þetta sé allt saman eitthvert náttúrulögmál sem hún ber enga ábyrgð á. Hún ætlar kannski að kynna aðgerðir eftir páska eða bara einhvern tímann þegar hentar.

En hér koma nokkrar tillögur til ríkisstjórnarinnar frá mér. Er hæstv. forsætisráðherra tilbúinn að lofa því að skattar hækki ekki frekar á samningstímanum? Hvað með að halda gjaldskrárhækkunum í 2,5% eða að ganga sjálf á undan með góðu fordæmi í stað þess að velta allri ábyrgðinni yfir á heimilin og vinnumarkaðinn? Því það var einmitt forsenda þess að hóflegir kjarasamningar næðust að allir myndu róa í sömu átt. Er hæstv. forsætisráðherra tilbúinn að lýsa yfir að skattar og gjaldskrár hækki ekki frekar á samningstíma kjarasamninga?

Ég vil ítreka það að verðbólga og vextir eru ekki náttúrulögmál heldur afleiðing pólitískra ákvarðana og aftur segi ég: Ríkisstjórnin hagar sér eins og þetta sé allt saman eitthvert náttúrulögmál sem hún ber enga ábyrgð á. Því spyr ég hæstv. forsætisráðherra: Hvaða aðgerðir ætlar ríkisstjórnin að kynna nú þegar til að styðja við verðbólgumarkmið Seðlabankans, verja kjarasamningana í landinu og sýna í verki að hún ætli loksins að bera einhverja ábyrgð?