Stefna til næstu ára þegar kemur að hlutafélögum í eigu ríkisins.

Frú forseti. Ég vil nú byrja á því að þakka hv. þm. Nönnu Margréti Gunnlaugsdóttur fyrir þessa umræðu um opinber hlutafélög og sömuleiðis fyrir svör hæstv. ráðherra. Það er rétt sem hv. þm. Stefán Vagn Stefánsson sagði hér, þetta hefur verið talsvert í umræðunni í fjárlaganefnd og það hefur verið ánægjulegt að taka þátt í þeirri vinnu. En það er ýmislegt sem þarf að huga að í þessum málum, m.a. það að reglan er sú að hæstv. fjármálaráðherra skipar stjórnir jafnvel á sviði félaga sem eru undir öðrum fagráðherra þannig að það þarf að vera ákveðið samtal og samræming til þess að hlutirnir gangi og að ekki verði tvíverknaður, t.d. á milli Vegagerðarinnar og Betri samgangna ohf. Ég treysti hæstv. ráðherra til að gera það þannig að menn leysi úr skörun og að fjármunir og verkefni skipist sem best verður á kosið. Þessi yfirferð fjárlaganefndar hefur verið ánægjuleg. Það var ánægjulegt og fróðlegt að kynnast framkvæmdastjórum og stjórnarmönnum í umræddum félögum. En það hefur borið á gagnrýni hér í þessum sal á hvernig skipað hefur verið í þessar stjórnir. Ég tel rétt að hlýða á hana. Það hefur verið bent á að saga einstakra stjórnarmanna sé kannski óheppileg en einnig hvað varðar fagþekkingu og fleira. En mér finnst rétt að fara yfir þetta og það gæti verið leið, frú forseti, að hæstv. ráðherra beri mögulega tillögur að stjórnarmönnum undir fjárlaganefnd, eða þá undir nefnd á hennar vegum, þannig að það sé hægt að koma með athugasemdir. Það er ekki bara það að augu sjá betur en auga heldur hefur stjórnarandstaðan þá hverju sinni betri aðgang að málum. Það skiptir miklu máli að það sé sátt um þessar stjórnir því þær gegna mikilvægu hlutverki í okkar landi þar sem staðan er bara þannig (Forseti hringir.) að við getum ekki verið með samkeppnisrekstur um alla hluti heldur þurfa ákveðnir þættir að vera í opinberum rekstri.