umgjörð þjóðaratkvæðagreiðslu um framhald viðræðna við ESB.
Virðulegi forseti. Landskjörstjórn hefur nú sent inn umsögn við þingsályktunartillögu ríkisstjórnarinnar um þjóðaratkvæðagreiðslu um aðildarumsókn að ESB. Niðurstaðan er falleinkunn. Landskjörstjórn segir spurningu í tillögu hæstv. utanríkisráðherra vera bæði óskýra og villandi og skapa óvissu um hvað raunverulega er verið að kjósa um. Það er þung gagnrýni. Í rökstuðningi sínum vísar landskjörstjórn m.a. til viðmiða Feneyjanefndarinnar um framkvæmd þjóðaratkvæðagreiðslna þar sem mælt er með því að óhlutdrægur aðili taki afstöðu til skýrleika spurningarinnar sem bera á upp við þjóðina. Jafnframt gerir landskjörstjórn alvarlegar athugasemdir við tímasetningu atkvæðagreiðslunnar sem geti torveldað framkvæmd kosninga og dregið úr trausti á henni. Hún bendir einnig á að dagsetningin 29. ágúst geti valdið verulegum erfiðleikum við utankjörfundaratkvæðagreiðslu og hlutlausa kynningu málsins fyrir kjósendum.
Ég hef gagnrýnt þetta frá upphafi, einmitt á sama grunni og landskjörstjórn hefur nú gert, að ekki skyldi vera leitað formlega eftir mati hlutlauss aðila á orðalagi spurningarinnar áður en málið var keyrt af stað, að ekki skyldi vera vandað betur til verka og að tímasetningin bæri þess merki að pólitísk hentisemi væri höfð ofar vandaðri málsmeðferð. Mín spurning er því þessi: Telur hæstv. utanríkisráðherra virkilega ásættanlegt að leggja fyrir þjóðina spurningu sem landskjörstjórn telur að geti vakið tortryggni um áhrif á afstöðu kjósenda? Ef ráðherra viðurkennir nú að breyta þurfi orðalaginu, mun hún þá einnig fallast á að endurskoða tímasetningu þjóðaratkvæðagreiðslunnar svo tryggt verði að framkvæmdin, umræðan og traustið verði yfir allan vafa hafið?
