utanríkis- og alþjóðamál 2025.
Frú forseti. Ég ætla að reyna að halda mig frá Evrópusambandsumræðunni en einhvern veginn leitar þetta alltaf þangað og núna í síðustu andsvörum. Grunnatriði er að við Íslendingar viljum ekki atvinnuleysi, þó ekki væri nema annað. Menn taka atvinnuleysi út í stað evru, þ.e. ef við værum með evru þá er líklegt að það gerist.
Mig langaði fyrst og fremst að spyrja hv. þm. Dagbjörtu Hákonardóttur, sem er formaður Íslandsdeildar Norðurlandaráðs og hennar ræða bar svolítinn keim af því, hvort hún hafi kynnt sér skýrslu Björns Bjarnasonar frá 2020 og það sem kemur fram í henni varðandi samstarf Norðurlanda. Þetta er skýrsla sem utanríkisráðherrar Norðurlanda óskuðu eftir, ég held að þáverandi utanríkisráðherra Íslands, Guðlaugur Þór Þórðarson, hafi komið með þá tillögu en það var líka til eldri skýrsla frá Stoltenberg eldri, þeim norska. Þarna er einmitt komið mjög mikið inn á netöryggismálin, fjölþáttaógnir og helstu punkta sem við erum kannski að ræða hér. Mig langaði bara að spyrja hv. þingmann í framhaldi af þessu um umræðuna í Norðurlandaráði, hún hefur gjörbreyst á undanförnum tveim, þrem árum. Fyrir fjórum, fimm árum voru varnar- og öryggismál ekki rædd í Norðurlandaráði og á fundum þar. En svo hefur orðið þessi gríðarlega breyting þar sem netöryggismálin, fjölþáttaógnir og þess háttar hafa tekið svolítið mikið yfir að mörgu leyti. Þetta kom einmitt mjög ítarlega fram í skýrslu Björns Bjarnasonar og Jónu Sólveigar Elínardóttur 2020, svolítið áður en þessi umræða var tekin upp á Norðurlandaráðsþinginu. Ég vil spyrja kannski bara um samstarf sérstaklega Norðurlandaþjóðanna í þessum málum. Það má t.d. benda á að gagnaver atNorth eru þrjú á Íslandi og sama fyrirtæki (Forseti hringir.) er með gagnaver í a.m.k. þremur öðrum norrænum ríkjum, í Danmörku, Svíþjóð og Finnlandi.
