þjóðaratkvæðagreiðsla um framhald viðræðna um aðild Íslands að Evrópusambandinu.

Virðulegi forseti. Ég þakka hv. þingmanni kærlega fyrir síðara andsvar. Það hefur reyndar komið fram að það eru ákveðin sóknarfæri fyrir íslenskan sjávarútveg við það að ganga í Evrópusambandið, bæði hafa verið birtar nýlegar skýrslur um það og það er staðreynd að okkar markaðsaðgangur inn á nokkra markaði gæti aukist töluvert við það að ganga þarna inn. En til að svara þessari spurningu þá lít ég þannig á að við værum með sérstakt fiskveiðistjórnarsvæði þar sem myndu gilda sérstakar reglur og það þyrfti að tryggja að heildarúthlutun aflamarks færi fram fyrir tilstuðlan vísindalegrar ráðgjafar og ákvarðana íslenskra stjórnvalda og þessi atriði yrðu tryggð í aðildarsamningi. Varðandi Möltu þá er vissulega rétt að það er ákveðin sérlausn, það er stundum hlegið að henni en engu að síður er það ákveðin sérlausn sem er hluti af sameiginlegu sjávarútvegsstefnunni sem var skrifuð inn í aðildarsamning Möltu árið 2004 og hefur haldið alla tíð síðan.