þjóðaratkvæðagreiðsla um framhald viðræðna um aðild Íslands að Evrópusambandinu.

Herra forseti. Ég þakka hv. þingmanni fyrir andsvarið. Ég var að reyna að fletta þessum dagsetningum upp og leitaði til mér fróðari manna í því; þessar undanþágur sem eru tengdar Finnum og Svíum eru settar 1994 og við getum ekki séð í fljótu bragði að það séu einhverjar lokadagsetningar á því heldur séu þetta varanlegar undanþágur sem þeir hafa í þessu samhengi. Ég held að ég sé vonandi að fara með rétt mál um að þetta sé ekki rétt hjá þingmanninum að dagsetningarnar séu að renna út á næstu tveimur, þremur árum.

Varðandi landbúnaðinn og mikilvægi hans þá eru í markmiðunum fleiri atriði sem kannski koma ekki fram í andsvari hv. þingmanns sem ég tel mikilvægt að hnykkja á þegar við ræðum þetta, þ.e. vernd innlendra dýrastofna og sjúkdómastöðu sem er gríðarlega mikilvægur þáttur í þessu. Við erum nú þegar með undanþágu í EES-samningnum og mjög mikilvægt fyrir okkur að halda því á lofti að við tryggjum það áfram í samningaviðræðum þegar þar að kemur.

Enn og aftur: Ég er viss um það að við erum sammála, ég og hv. þingmaður, herra forseti, um það að tryggja landbúnaðinum brautargengi í samningaviðræðum; tryggja það að hér sé fjölbreytt starfsemi um allt land. Það veitir ekki af því vegna þess að landbúnaðurinn hefur átt undir verulegu höggi að sækja síðustu ár á Íslandi.