þjóðaratkvæðagreiðsla um framhald viðræðna um aðild Íslands að Evrópusambandinu.
Frú forseti. Ég þakka hv. þingmanni fyrir andsvarið. Ég tek heils hugar undir áhyggjur hans varðandi þessi áhrif erlendra aðila og þá Evrópusambandsins. En ég hef áhyggjur í báðar áttir vegna þess að þegar maður tekur samtalið við fólkið í samfélaginu þá er umræðan svolítið pólariseruð. Þeir sem eru hliðhollir Evrópusambandinu tala í eina átt og þeir sem eru á móti Evrópusambandinu tala í aðra. Í raun er það þannig að þetta eru svo rosalega ólík sjónarmið að einstaklingar sem eðli málsins samkvæmt þekkja ekki vel til málsins vita ekki hverju þeir eiga að trúa. Það er því afar mikilvægt að við tryggjum góða og gagnsæja upplýsingagjöf. Aðrar þjóðir hafa áttað sig á því hvað erlend öfl geta gert, í valdi fjármagns, sem dæmi, og aðgengis að því að vita fyrir fram nákvæmlega hvenær atkvæðagreiðsla á að fara fram. Þá er hægt að undirbúa hlutina vel og nýta sumarið til að hafa skoðanamyndandi áhrif á almenning í landinu hvað það varðar sem við eigum að greiða atkvæði um 29. ágúst, ef þetta gengur að óbreyttu eftir. Það er afar mikilvægt að við förum í það og það hefði klárlega átt að vera hluti af undirbúningi málsins að undirbúa lög og reglugerðir með þeim hætti að við værum búin að fjárfesta í þessum greiningartækjum sem aðrar þjóðir eru að gera til að koma í veg fyrir þessa hluti, til að koma í veg fyrir að auglýsingapláss sé keypt upp jafnvel fyrir upplýsingar sem eru ekki réttmætar og eru skoðanamyndandi. Það er að mínu mati afar mikilvægt og það er áfellisdómur yfir ríkisstjórninni að hún hafi ekki lagt í það að fara í fjárfestingar í þessum þáttum. Við erum m.a. með nefnd sem er að vinna að netöryggi sem hefði getað gripið þennan bolta og það er áfellisdómur yfir ríkisstjórninni að hún hafi ekki gert þetta í undirbúningi málsins til þess að koma einmitt í veg fyrir slíkt.
