þjóðaratkvæðagreiðsla um framhald viðræðna um aðild Íslands að Evrópusambandinu.

Virðulegi forseti. Ég þakka hv. þingmanni fyrir svarið og mig langar einmitt til að undirstrika og taka undir það að auðvitað er textinn sjálfur og rauðu línurnar — þetta er í sjálfu sér samningsumboð eins og hv. þingmaður kom inn á hér áðan. Þetta er þannig líka þessi rammi sem mótsamningsaðili hefur þá skýran frá þinginu og öll þjóðin sömuleiðis. Ég fæ oft þessa spurningu frá fólki: Hvað á ég að lesa? Í raun og veru ættu þessi gögn að vera með þeim hætti að þau væru fullnægjandi því að það er það sem ríkisstjórnin er að bera á borð, ef svo má segja. En mig langar til að nýta seinna andsvarið til að sækja í viskubrunn hv. þingmanns varðandi sjávarútveginn og spyrja: Hvaða áskoranir sér hv. þingmaður þegar t.d. er horft á samninga um deilistofna og sömuleiðis varðandi veiðar og samþættingu við vinnslu, eins og hefur verið áhersluatriði hér á landi?