þjóðaratkvæðagreiðsla um framhald viðræðna um aðild Íslands að Evrópusambandinu.
Virðulegur forseti. Ég held að það sé ágætt að hafa í huga orð forsvarsmanns eins af stærri fyrirtækjum okkar, sem er reyndar að mjög stórum hluta í eigu lífeyrissjóðanna líka. Hann sagði að aðild að Evrópusambandinu væri kannski alls ekki svo slæm fyrir eigendur þessara fyrirtækja. Það er gríðarlegt fjármagn í Evrópusambandinu þegar kemur að sjávarútvegi, miklir styrkir sem eru veittir. Það er alveg ljóst, algerlega kristaltært, að hvaða undanþágur sem við fáum, sem ég hef ekki trú á að verði miklar og ekki varanlegar, þá getum við ekki staðið á því skilyrði sem við erum með í dag, þ.e. að erlendir aðilar geti ekki átt meiri hluta í íslenskum sjávarútvegsfyrirtækjum. Hvað myndi það þýða? Það myndi einfaldlega þýða að þeir myndu koma hér inn og fara að stjórna meiru. Síðan myndu þeir setja upp styrktarvinnslur í Evrópusambandsríkjunum, þar sem helmingurinn er greiddur af uppbyggingu slíkra vinnsla með nútímabúnaði, og landa fiskinum þar eða vinna hann þar. Við vinnum yfir 90% af öllum okkar sjávarafurðum í fullvinnslu inn á borð neytenda. Í Noregi eru það 70% sem eru seld erlendis óunnin. Við myndum að sjálfsögðu missa þessa vinnslu til ríkisstyrktra eða styrktra vinnsla í Evrópusambandinu þar sem launin eru líka miklu lægri í mörgum löndum. Það gefur augaleið.
