þjóðaratkvæðagreiðsla um framhald viðræðna um aðild Íslands að Evrópusambandinu.
Forseti. Ég þakka hv. þm. Þórarni Inga Péturssyni fyrir góða spurningu. Ég er algerlega sammála því að eitthvað gefur eftir og ekki bara að það gefi eftir af því að við leggjum meira inn en við fáum frá Evrópusambandinu heldur er það svo að í stað þess að við séum að skapa hér einfalt og skilvirkt umhverfi fyrir til að mynda fyrirtækin — og við gerum það á margan hátt, t.d. í gegnum EES-samninginn, en við höldum þó í sérstöðu okkar að geta hreyft okkur hratt; við erum að nýta smæð þjóðarinnar og semja við öll lönd. Við gerum fríverslunarsamning til að mynda við Kína en hann mun falla úr gildi ef við göngum inn í Evrópusambandið þannig að það er margt sem við missum. En ég held að það sé aðallega einmitt þetta, mér finnst það segja sig sjálft að þú ert kominn í þetta risastóra bákn, þú ert kominn alla leið inn og við erum ekkert að fá að ráði umfram það sem við höfum með EES-samningnum en við erum að taka á okkur alveg gríðarlega miklar, auknar byrðar og við vitum að við erum að fara að taka á okkur regluverk sem er orðið svo íþyngjandi og svo flókið að Evrópusambandið er að dragast aftur úr Bandaríkjunum, Kína, Japan, meira að segja þriðja heims löndunum. Þetta er af því að þau eru búin að reglugerðavæða sig út úr samkeppninni. Þannig að ég myndi alla vega segja að við værum í mun betri málum fyrir utan sambandið en innan þess.
