þjóðaratkvæðagreiðsla um framhald viðræðna um aðild Íslands að Evrópusambandinu.

Frú forseti. Ég þakka hv. þm. Þórarni Inga Péturssyni fyrir prýðilega ræðu. Mér heyrðist svona í fljótu bragði að ég gæti kvittað undir hvert orð sem þar kom fram. Mig langar að spyrja aðeins út í efnisatriði ræðunnar í seinni spurningu minni en mig langar hins vegar að byrja á öðrum stað. Nú var að birtast kl. 19:17 frétt á mbl.is undir yfirskriftinni „Ný aðildarríki ESB yrðu án neitunarvalds fyrstu árin“ og síðan er þetta rakið í stuttu máli, með leyfi frú forseta:

„Þeirri hugmynd er fleytt sem mögulegri lausn til þess að flýta fyrir því að umsóknarríkjum í austanverðri Evrópu verði veitt aðild áður en áratugurinn er liðinn, en gæti átt við mögulega framtíðarumsókn Íslands til sambandsins, enda yrði slíkt ákvæði fordæmisgefandi.“

Ég hvet alla til að lesa þessa frétt, mjög áhugaverð, en mér vinnst ekki tími til að fara dýpra í hana hér, frú forseti. En í ljósi þess að nú hefur það hreinlega verið viðurkennt, þá loksins að það var viðurkennt, til að mynda af hv. formanni utanríkismálanefndar, að vissulega verðum við nettógreiðendur inni í Evrópusambandinu þá setur að manni örlítið kaldan hroll við að lesa þetta því að hér erum við að fá inn væntanlega með meiri hraða fleiri ríki sem ekki eru nettógreiðendur. Mig langar að spyrja hv. þingmann, sem ég veit ekki hvort er búinn að sjá þessa frétt þannig að þetta er kannski pínu ósanngjarnt af mér að því leytinu til, ef rétt reynist í þessari frétt Morgunblaðsins, hvort það sé ekki enn frekari ástæða núna til að segja nei heldur en var bara fyrir nokkrum klukkutímum síðan.