þjóðaratkvæðagreiðsla um framhald viðræðna um aðild Íslands að Evrópusambandinu.

Frú forseti. Ég þakka hv. þingmanni kærlega fyrir andsvarið. Ég taldi mig svo sem hafa farið nokkuð ítarlega yfir mikilvægi tollverndar fyrir innlenda matvælaframleiðslu en hv. þingmaður spyr vum matvælaöryggi og ég ætla að taka hvort tveggja, þ.e. fæðuöryggi þjóðarinnar og matvælaöryggi. Ef við byrjum á matvælaöryggi komum við þar inn á dýraheilbrigði sömuleiðis, innflutning á kjöti sem t.d. inniheldur sýklalyf, lyfjaleifar o.s.frv. Við erum ekki örugg með uppruna matvælanna sömuleiðis en við höfum sett ákveðnar reglur varðandi innflutning matvæla og þar af leiðandi getur þetta haft neikvæð áhrif á matvælaöryggi. En það kemur til með að hafa gríðarleg áhrif á fæðuöryggi þjóðarinnar ef tollvernd er slegin af, það er alveg klárt. Það sem gerist ef tollverndin er slegin af er að þá mun innlend matvælaframleiðsla gefa eftir og minnka. Það er reynsla Finna og það er reynsla Svía, þ.e. norðan við 62. breiddargráðu og Ísland er allt þar norðan við, fyrir utan Vestmannaeyjar sennilega. En lykilatriðið er þetta: Ef við ætlum að verja fæðuöryggi þjóðarinnar þá göngum við ekki í Evrópusambandið vegna þess að þá verðum við að fella niður tollvernd og ef við fellum niður tollverndina þá verðum við að bæta framleiðendum það upp með beinum stuðningi. Þá þurfum við að auka stuðning ofan á þann stuðning sem Evrópusambandið veitir í stuðningsgreiðslur til matvælaframleiðslu.