þjóðaratkvæðagreiðsla um framhald viðræðna um aðild Íslands að Evrópusambandinu.

Frú forseti. Ég þakka hv. þingmanni fyrir andsvarið og vil byrja á því að segja að það er ákveðið óvissuástand í íslenskum landbúnaði í dag, bara vegna þess að það er verið að velta því fyrir sér hvað sé að fara að gerast 29. ágúst eða hvenær sem þessi þjóðaratkvæðagreiðsla á að fara fram. Það er þannig að þegar óvissuástand skapast þá halda menn að sér höndum þegar kemur að fjárfestingum. Það er alveg klárt mál að ef af yrði, sem ég vona að verði ekki, ef Ísland yrði aðili að Evrópusambandinu þá er alveg ljóst að með þeim breytingum sem verða, þ.e. að tollverndin verði tekin af, þó svo að við færum finnsku og sænsku leiðina varðandi 62. breiddargráðu, kemur íslenskur landbúnaður ekki til með að lifa það af. Það er mín skoðun og það er skoðun mjög margra annarra, það er alveg ljóst. Allt svona, við sáum þetta sömuleiðis í fyrra þegar við vorum að fjalla um veiðigjöld, hefur neikvæð áhrif á rekstur. Það er nákvæmlega það sama þegar það er óvissa. Það var óvissa þá og það er óvissa núna fyrir innlenda matvælaframleiðslu og það hefur klárlega áhrif. Þetta kemur fram í umsögn Bændasamtaka Íslands þar sem bent er á að nú þegar sé þetta óvissuástand komið upp og þar af leiðandi séu framleiðendur, bændur, farnir að halda að sér höndum varðandi það að fara í nýfjárfestingar og velta fyrir sér tækifærum framtíðarinnar.