þjóðaratkvæðagreiðsla um framhald viðræðna um aðild Íslands að Evrópusambandinu.

Frú forseti. Eins og ég gat um áðan hefur beiðnum varðandi leynigögnin einfaldlega ekki verið svarað. Hins vegar bárust líka beiðnir, eins og getið var um hér í fyrri umræðu um fundarstjórn forseta, um þátttöku ráðherra í umræðunni. Því var svarað með þeim hætti að í það minnsta væri hæstv. utanríkisráðherra væntanlegur í umræðuna. Þetta var upp úr hádegi í gær, frú forseti. Þá var hæstv. ráðherra sagður upptekinn á fundi en væri væntanlegur og hygðist blanda sér í umræðuna. Hæstv. ráðherra var að vísu settur á mælendaskrá en færði sig neðar og neðar á mælendaskránni og hvarf svo að lokum. Með öðrum orðum, svör hæstv. forseta reyndust ekki rétt. Hæstv. utanríkisráðherra hljóp í felur að nýju. Þess vegna er ástæða til að ítreka báðar spurningar, bæði um leynigögnin (Forseti hringir.) og um þátttöku hæstv. ráðherra í þessari umræðu: Er hennar að vænta eða hafa hæstv. ráðherrar það lítið álit á Alþingi að í þessu stóra máli telji þeir óþarft að þeir blandi sér í umræðuna?