þjóðaratkvæðagreiðsla um framhald viðræðna um aðild Íslands að Evrópusambandinu.
Herra forseti. Meðal þess sem ég hef gert að umtalsefni í þessari umræðu eru þættir eins og fullveldið, hvaða umboð er verið að veita og samningsmarkmið. Ég vitnaði í umsagnir og hyggst gera það aftur núna og greinar sem hafa verið skrifaðar af aðilum sem teljast held ég af öllum meira og minna málsmetandi aðilar, hvort sem fólk aðhyllist aðlögun og inngöngu í Evrópusambandið eður ei. Þetta hef ég gert m.a. markvisst til þess að þetta sé ekki eingöngu einhver svona hreinræktuð pólitísk orðræða heldur reynt að draga inn í þennan sal og inn í þessa umræðu hin ýmsu álit.
Ég renndi áðan aðeins yfir umsögn sem Frosti Sigurjónsson skrifaði og sendi inn og lauk tilvitnun í þá umsögn þar sem 7. lið umsagnar var að ljúka. Aðeins var eftir ein málsgrein af 7. lið þar sem segir, með leyfi forseta:
„Komi ekki fram staðfestingar frá ESB um að varanlegar undanþágur séu í boði, sem væri þá ný stefna af hálfu ESB, verður að teljast villandi að ala á slíkum væntingum meðal kjósenda í aðdraganda þjóðaratkvæðagreiðslunnar. Utanríkismálanefnd verður að sjá til þess að kjósendur verði ekki blekktir að þessu leyti.“
Þarna lýkur, herra forseti, 7. lið umsagnar Frosta Sigurjónssonar, en í 8. lið eru líka mjög áhugaverðir punktar sem hann kemur inn á, m.a., herra forseti, punktar sem ég var búinn að nefna í einhverjum af þeim ræðum sem ég hef flutt án þess að vitna til þessarar umsagnar. Í 8. lið segir m.a., með leyfi forseta:
„Ísland er með fríverslunarsamninga við tugi ríkja og þar á meðal Kína, sem myndu falla niður við inngöngu í ESB. Við aðild færi Ísland inn fyrir tollmúra ESB sem eru hannaðir til að verja iðnaðinn í ESB og ýmsa hagsmuni þar og miðast ekki við okkar hagkerfi. Iðnaðarvörur og bílar myndu í mörgum tilfellum hækka í verði. Kolefnistollur ESB myndi leiða til þess að vörur sem krefjast mikillar orku í framleiðslu verða mun dýrari innan tollmúra ESB en utan.“
Þetta er meðal þess sem þarf að tryggja, herra forseti, að allur almenningur verði upplýstur um á skýran og óhlutdrægan hátt áður en við göngum til kosninga. Mig langar, með leyfi forseta, að vitna aftur til 8. liðar umsagnarinnar og biðst forláts á framburðinum:
„Guy Verhofstadt, sem fór með Brexit-málefni fyrir Evrópuþingið, sagði í ræðu í Strassborg þann 5. apríl 2017 að það mætti aldrei gerast að ríki sem gengi út fengi betri kjör en ríki sem væri áfram í ESB. Hann taldi að það gæti þýtt endalok Evrópusambandsins og því yrði að gæta þess að Brexit yrði ekki eftirsóknarvert fordæmi fyrir aðra.“
Þetta eru mjög áhugaverð ummæli og ekki hægt að skilja á neinn annan hátt, herra forseti, heldur en sem beina hótun, þ.e. finni þjóðir sig knúnar til að ganga með tilheyrandi átökum, kostnaði og erfiðleikum út úr Evrópusambandinu á einhverjum tíma þá liggja þessi ummæli eftir og ber að skoða sem einhvers konar hótun.
Ég get svarið það, herra forseti, að ég er aftur að renna út á tíma. Ég hyggst koma hér í næstu ræðu og vitna í fleiri aðila sem hafa tjáð sig varðandi þetta ferli, bæði um inngöngu og útgöngu, en mér vinnst ekki tími til þess í þessari umferð og óska því eftir að vera settur aftur á mælendaskrá.
