þjóðaratkvæðagreiðsla um framhald viðræðna um aðild Íslands að Evrópusambandinu.

Frú forseti. Ég velti fyrir mér hvort það sé einhver misskilningur á því hvað eru varanlegar undanþágur og hvað er aðlögun. Á tíu ára afmæli Viðreisnar kom maður að nafni Guy Verhofstadt, fyrrverandi forsætisráðherra Belgíu og mikill Evrópuþingmaður. Hann hefur bent á það opinberlega að Evrópusambandið virkar ekki þannig að þú getir bara valið bestu bitana og sleppt þeim lélegu. Getur hæstv. ráðherra útskýrt fyrir mér hvort hún telji að Ísland eitt ríkja fái varanlegar undanþágur í þessum samningaviðræðum? Til að mynda Króatía, sem er síðasta landið sem fór inn í Evrópusambandið; það tók átta ár að semja við Króatíu og þeir fengu engar varanlegar undanþágur. Það að kíkja í pakkann og sjá samning — þýðir það í huga hæstv. ráðherra aðlögun að Evrópusambandinu eða ætlar hæstv. ráðherra að halda því fram við þjóðina að við séum að fara að semja um varanlegar undanþágur þegar ekkert annað land hefur fengið varanlegar undanþágur undanfarna áratugi?