þjóðaratkvæðagreiðsla um framhald viðræðna um aðild Íslands að Evrópusambandinu.

Virðulegur forseti. Þegar maður sækir um aðild að einhverjum klúbbi eða félagi þá fer maður ekki inn með þær forsendur að maður ætli að breyta stofnsamþykktum viðkomandi klúbbs eða félags heldur sækir maður um aðild vegna þess að maður vill sækja um aðild og ég veit að formaður Viðreisnar vill sækja um aðild að Evrópusambandinu. Í ræðu sinni fór ráðherrann yfir hluti sem ríkisstjórnin ræður ekki við. Fimmta mánuðinn í röð er verðbólgan hér yfir 5% og hér var haldið fram að við aðild að Evrópusambandinu, jafnvel samningsvegferðina, myndu 100 milljarðar skila sér til fólksins í landinu. Formaður utanríkismálanefndar gengur hér um með pítsu um allar götur Reykjavíkur. [Hlátur í þingsal.]

Mig langar að spyrja: Er það rétt að samræmd verðbólga sé 4,9% á Íslandi í apríl 2026, 4,9% í Litáen, 5,2% í Lúxemborg, 5,4% í Króatíu sem er nýbúin að taka upp evru, 6% í Búlgaríu og 9,5% í Rúmeníu sem eru allt Evrópusambandslönd? Er það rétt að matvælaverð, (Forseti hringir.) sem hefur verið fjallað hér um, að það sé 0% virðisaukaskattur á Írlandi, 4% á Ítalíu og Spáni, 5% í Frakklandi (Forseti hringir.) og það væri hægt að lækka matvælaverð á Íslandi ef ríkisstjórnin myndi gera eitthvað í því og lækka verðbólguna í leiðinni? Er það rétt? (Forseti hringir.) Og er það rétt sem hæstv. ráðherra hélt hér fram, að hér myndu koma 100 milljarðar (Forseti hringir.) við það eitt að gera svona hókus-pókus, og hvernig samhengi er það við þá hluti sem ég var að benda á áðan?

(Forseti (BHar): Forseti minnir á að það er eingöngu ein mínúta í andsvörum þegar fjórir hafa óskað eftir því að veita andsvar.)

Ég lofa að gera þetta aldrei aftur. [Hlátur í þingsal.]

(utanrrh.: Má treysta því?)