þjóðaratkvæðagreiðsla um framhald viðræðna um aðild Íslands að Evrópusambandinu.
Virðulegi forseti. Ég þakka hv. þingmanni síðara andsvarið. Ríkin í Evrópusambandinu eru ólík. Þarna eru ríki sem sannarlega hafa verið að blómstra að undanförnu og ég get nefnt Pólland sem dæmi og mörg önnur ríki í þeim heimshluta. Danmörk hefur staðið sig mjög vel. Aðild Írlands að Evrópusambandinu hefur verið ein samfelld sigursaga. Holland er sömuleiðis ríki sem stendur sig mjög vel. Evrópusambandið er auðvitað meðvitað um þessar áskoranir þegar kemur að samkeppnishæfni. Ég held reyndar að það sé ekki raunhæft fyrir svæði eins og Evrópusambandið að verða ja, jafnoki Kína á næstu árum. Þar er einfaldlega á ferðinni efnahagssvæði sem vex mjög hratt og mjög vel og byrjar einfaldlega á allt öðrum stað, var miklu fátækara til að byrja með.
Þegar kemur að þessum varanlegu og tímabundnu undanþágum er fólk sammála eða ekki en ég held að það sé óumdeilt að Danir eru með varanlega undanþágu frá nokkrum hlutum, t.d. dómsmálunum og evrunni. Þeir voru með varanlega undanþágu frá samstarfi í varnarmálum. Írar eru með varanlega undanþágu frá samstarfi í varnarmálum. Bretar voru með nokkrar varanlegar undanþágur, þannig að þetta er til. (Forseti hringir.) En spurningunni um hvort þetta náist fram verður ekki svarað nema við göngum til aðildarviðræðna og fáum að sjá samning og það er það sem mér finnst að þetta mál eigi að snúast um.
