fjármálaáætlun fyrir árin 2027--2031.

Frú forseti. Ég þakka fyrir svarið. Mér finnst kannski rétt að ítreka að það hefur verið ánægjulegt samstarf í hv. nefnd og ég hef fengið góð ráð frá hv. þingmanni þegar ég hef farið fram úr mér og reynt að læra af reynslu hv. þingmanns. Það er þakkarvert að geta sótt í þann reynslusjóð. Hv. þingmaður nefndi hér málefni öryrkja og ég held að það séu einmitt ákveðin tækifæri í því sem felast m.a. í því lífeyriskerfi sem var sett á fyrir tæpu ári. Ef við nálgumst það rétt, að við komum þeim sem eru dottnir úr virkni í aukna virkni, þá er það eitthvað sem er tekjuskapandi og verður þá auðveldara fyrir okkur að ná endum saman í ríkisfjármálunum. Það eru einmitt svona mál sem við eigum að nálgast af jákvæðni og fleiri mál því að það er sameiginlegur hagur allra landsmanna að ríkissjóður sé rekinn hallalaus.

Síðan er það eitt sem hefur verið hér í umræðunni, að það er verið að ýkja svolítið þessi frávik með nýrri spá Seðlabankans, að þessi fjármálaáætlun sé eitthvað ómarktæk og þess vegna vilja menn fá hér einhvern þingstubb í ágúst. Ef maður skoðar það, þá eru þessi frávik ekki þess eðlis að það kalli á algera upptöku á þessari áætlun til fimm ára, sérstaklega ef það liggur fyrir að við höfum hér áætlun um að fjárlagafrumvarpið taki tillit til þeirra breytinga sem hafa orðið. Er ekki bara málið, frú forseti, að hv. þingmenn stjórnarandstöðunnar vilja fá þennan stubb í aðdraganda þjóðaratkvæðagreiðslunnar? Það kunna alveg að vera rök til þess og mögulega gæti ég tekið undir það að einhverju marki, en þær forsendubreytingar sem eru ræddar hér, ég tel að (Forseti hringir.) það sé orðum aukið að ræða þær þá. Miklu frekar mætti kalla saman þingið til að ræða þjóðaratkvæðagreiðsluna.