fjárlög 2027.

Forseti. Það gefur augaleið að það er ekki réttlætanlegt að bæta mikið lengur við skuldir ríkissjóðs nema það komi bara eitthvert tilfallandi áfall. Auðvitað vitum við ekki hvernig mál munu þróast á næsta ári, til að mynda ef aðstæður breytast ytra. Þetta hefur auðvitað verið mikil byrði á ríkissjóði en ég verð reyndar að segja að ég er sjálf á þeirri skoðun að stærsta einstaka ástæðan fyrir því að við þurfum að stoppa þennan hallarekstur er bara almennt umsvif ríkisins í þenslu. Ég er ekki það kreddukennd að ég haldi því fram að ríkið þurfi alltaf og undir öllum kringumstæðum að vera yfir núllinu. Ef það er slaki í kerfinu þá er allt í lagi að það sé undir því. En undir núverandi kringumstæðum gengur það auðvitað ekki upp. Varðandi bankaskattinn þá var hann lækkaður á sínum tíma á þeim forsendum að viðskiptavinir myndu njóta þess ávinnings. Sú varð ekki raunin. Hér er skýrsla sem var unnin fyrir ráðherra Framsóknarflokksins sem bendir réttilega á þetta. (Forseti hringir.) Þess vegna finnst mér ekkert óeðlilegt við það að maður geri þá kröfu, þegar hann er hækkaður aftur, að ávinningnum sé skilað.