fjárlög 2027.

Virðulegi forseti. Það hefur verið alveg skýrt að við höfum verið í miklu samráði við utanríkismálanefnd og komið iðulega með upplýsingar, bæði í trúnaði og líka opnu samráði, inn á fundinn. Það eru engin tíðindi, svo ég undirstriki það, sem felast í þessu bréfi. Ég vil líka vekja athygli á því sem m.a. kom fram hjá landskjörstjórn í upplýsingabæklingi varðandi þjóðaratkvæðagreiðsluna, að ef það yrði nei þá yrði bara einfaldlega ekki gert neitt frekar og það er í rauninni það sem við erum að gera. Það eru engin tíðindi sem birtast í bréfinu, um engia stefnumarkandi ákvörðun að ræða. Það er alveg skýrt að kosið var um áframhaldandi samningaviðræður við Evrópusambandið en ekki tekin afstaða til breyttrar stöðu aðildarferilsins. Við vorum hér og þjóðin var spurð: Eigum við að fara þangað? Þjóðin sagði nei. Þá erum við hér áfram. Svo einfalt er það. Það breytir ekki neinu í því þannig að málinu er lokið af hálfu ríkisstjórnarinnar. Ég held að við eigum að loka þessum kafla og ég hvet þingmenn til að horfa fram á við og taka þátt í þeim verkefnum sem eru fram undan. Það eru ærin verkefni fram undan, m.a. á sviði utanríkismála.

Af því að hv. þingmanni varð tíðrætt um einhverja leyndarhyggju og það er eins og sumir þingmenn geti ekki opnað munninn öðruvísi en að dylgja um alls konar hluti, þá veit ég alla vega það að ég hef talað við utanríkismálanefnd. Ég upplýsti hana nákvæmlega um hver staðan væri og hver mín afstaða væri til afturköllunar umsóknar eða til þessa óbreytta ástands sem við erum einfaldlega að vísa til. Ég vil líka minna hv. þingmann á, af því að hann var að tala um aðstoðarmannstíð sína í fyrri ríkisstjórn, að þá var m.a. komið inn með viðbót í varnarsamninginn við Bandaríkin 1951 sem skiptir mjög miklu máli af hálfu þess ráðherra sem hún aðstoðaði. En utanríkismálanefnd var ekki kölluð til. Þá var þingið ekki upplýst, þannig að ég frábið mér svona dylgjur og vísa þeim til föðurhúsanna.