fjárlög 2027.
Virðulegi forseti. Ég vil þakka hv. þingmanni sérstaklega fyrir þessa spurningu því að það skiptir máli í öllu þessu umróti einmitt að við ræktum okkar nánustu nágranna og næstu nágranna, sem eru Grænlendingar og síðan Færeyingar. Það er alveg ljóst að afstaða þessarar ríkisstjórnar í þessu róti í heiminum og því sem hefur verið sagt um Grænland, m.a. af hálfu Bandaríkjastjórnar, og afstaða okkar Íslendinga hefur alveg verið skýr alveg frá upphafi: að við stöndum að sjálfsögðu með Grænlandi og það er þeirra að ákveða sína framtíð. Ísland og Grænland eiga náttúrlega mjög gott tvíhliða samstarf. Við höfum gjarnan viljað auka það og dýpka, m.a. með opnun sendiskrifstofunnar, eins og við þekkjum, í Nuuk 2013 og síðan sendiskrifstofu Grænlands hér í Reykjavík, sem hefur auðvitað aukið samskiptin mikið. Mér finnast það mikil verðmæti að geta hitt hér reglulega fastafulltrúa Grænlendinga, ekki síst á þessum tímum, og geta spjallað við hann. Áherslur okkar stjórnvalda birtast með þeim hætti að löndin eiga í reglulegu samstarfi á ráðherra- og embættisstigi. Það er gott. Við munum halda áfram að fylgja eftir yfirlýsingu sem forsætisráðherrar landanna undirrituðu annars vegar 2022 og síðan 2025. Við höfum rætt það mjög opinskátt við Grænlendinga að við viljum gjarnan gera fríverslunarsamning við þá. Við skiljum að það eru mörg önnur mál akkúrat núna sem taka kannski meiri tíma hjá þeim. En það er alveg ljóst að við höfum ítrekað að það er vilji okkar Íslendinga að taka slík skref, alla vega aukin skref varðandi viðskiptamál. Við erum með þessa pólitísku viðveru á Grænlandi, m.a. útsendan aðalræðismann, eins og ég gat um. Við ætlum ekki eins og er að fjölga útsendum starfsmönnum þar en ég vil bara undirstrika að það er ríkur pólitískur vilji til þess að rækta og næra sambandið við Grænland og ég sé ekki síst mörg tækifæri og hef kynnst dásamlegu fólki sem er búsett á Grænlandi, m.a. í gegnum handboltann, það er ákveðið menningarstarf, og menningarsamstarf í gegnum listafólk og fleira mætti telja. Ég veit að sumar sveitarstjórnir hérna heima eru í góðu samstarfi við hinar ýmsu sveitarstjórnir á Grænlandi og þetta er eitthvað sem ég tel afar hjálplegt til þess einmitt að dýpka samstarfið og rætur okkar, landanna tveggja.
