20.02.1911
Neðri deild: -1. fundur, 22. löggjafarþing.
Sjá dálk 862 í B-deild Alþingistíðinda. (1202)
1. mál, stjórnarskrá Íslands
Forseti:
Það hefir verið látið í ljósi, að rétt væri að taka mál þetta út af dagskrá eða jafnvel vísa því algerlega frá, vegna þess að fyrirsögn frumvarpsins sé óformleg og komi í bága við 26. gr. þingskapanna. En þetta er ekki rétt athugað. Ákvæði 26. gr. þingskapanna er sett til þess að koma í veg fyrir, að samþykt verði af þinginu einföld lög, er feli í sér breytingar á eða viðauka við stjórnarskrána, og því verði að sjást á fyrirsögninni, að þar sé ekki um almenn lög að ræða, heldur um stjórnarskrárbreytingu. En hér er öðru máli að gegna, því að frumvarp þetta fer ekki fram á breytingu á eða viðauka við stjórnarskrána, heldur er það frumvarp til nýrrar stjórnarskrár, er fellir algerlega úr gildi núgildandi stjórnarskrá, ef það verður að lögum og það ber fyrirsögn frumvarpsins ótvírætt með sér. Eg sé því enga ástæðu til þess að taka málið út af dagskrá eða vísa því frá.
