03.05.1911
Neðri deild: -1. fundur, 22. löggjafarþing.
Sjá dálk 1056 í B-deild Alþingistíðinda. (1260)
108. mál, stjórnarskipunarlög
Sigurður Sigurðsson:
Ummæli hv. þm. Dal. (B. J.) og hv. 2. þm. Húnv. (B. S.), að því er snertir breyt.till. mína, hafa neytt mig til að standa upp. Annars ætlaði eg ekki að taka til máls, og það því síður, sem hv. framsm. (J. Ól.) tók vel í þessa brtill. mína. Aðalástæðan gegn till., um að þingið komi saman lögmæltan dag, er sú, að ekki sé nægilegt rúm í þinghúsinu fyrir háskólann, ef þingið er háð að vetrinum. En þetta hefir ekki við rök að styðjast. Ef öllu er vel fyrir komið, þá er nóg rúm fyrir háskólann niðri í húsinu. Hins vegar hafa verið færðar ástæður fyrir því, að ýmsum mönnum væri það hentugra, að þingið sé háð að vetrinum. En fyrst eg minnist á háskólann, skal eg benda á það, að þegar háskólalögin voru samþykt á síðasta þingi, mátti ganga að því vísu, að ekki mundi langt um líða, áður en fé yrði veitt til hans. En þótt eg sé og hafi verið á móti háskólanum, þá álít eg samt að fyrst asninn var leiddur inn í herbúðirnar, verði menn að taka afleiðingunum.
Hvað sjálfa tillöguna snertir, skal eg geta þess, að viðkunnanlegra er að tiltaka ekki í sjálfri stjórnarskránni ákveðinn dag, er sé samkomudagur þingsins. Það er hentugra að hafa sérstök lög um það efni, svo breyta megi þingtímanum, ef ástæður þykja mæla með því. Hitt er hégómamál og kappsmál, að setja þingtímann í samband við háskólann, og annað ekki, og hafa verið færðar ástæður fyrir því. Vona eg því, að tillaga mín, um að þingið komi saman »lögmæltan dag«, verði samþykt.
