16.08.1912
Neðri deild: -1. fundur, 23. löggjafarþing.
Sjá dálk 1055 í B-deild Alþingistíðinda. (1486)

61. mál, útflutningsgjald af fiski, lýsi o. fl.

Björn Kristjánsson:

Eg vil með örfáum orðum gera grein fyrir því hvers vegna eg vil að frv. þetta sé felt. Í fyrstu var eg, þegar eg leit á frumv. í fljótu bragði, ekki fjarri því að vera því meðmæltur, einkum vegna ákvæðisins um toll á síldarlýsi. Mér fanst rétt að leggja toll á þetta lýsi eins og annað lýsi, ef það væri ekki þegar tollað. En þegar nefndin fór að athuga lögin, þá uppgötvaðist það að sami tollur hvílir á þessu lýsi samkvæmt gildandi lögum sem þorskalýsi, nefnilega 30 au. á tunnuna, og þar sem nú þetta lýsi er ekki verðmætara en þorskalýsi, þá álít eg ekki ástæðu til að hækka tollinn á því sérstaklega. Þetta er ástæðan til þess að eg er nú á móti þessum lið frv.

Í öðru lagi er eg hikandi við að leggja toll á hinar vörurnar sem nefndar eru í frv., fóðurmjöl o. s. frv., bæði af því að við erum nú á aukaþingi sem stofnað er til í öðrum tilgangi en að leggja á skatta, og af því að eg álít ekki rétt að elta fyrirtæki sem verið er að setja á stofn. Tel hyggilegra að vera ekki of veiðibráður. Eg álít einkum varhugavert að tolla þessar vörur á aukaþingi, því að þá liti út eins og við keptumst við að elta með tollálögum hvert nýtt fyrirtæki sem stofnað er í landinu. En eg er ekki „í principi“ á móti útflutningsgjaldi á vöru; eg er þvert á móti meðmæltur því, og það af sömu ástæðu sem er þungamiðja farmgjaldsins, sem sé sú að vissa er fyrir að alt gjaldið verði greitt í landssjóð, ekki hægt að draga undan. Eg mun því ekki vera á móti því að leggja á reglulegu þingi útflutningsgjald á þessar vörur, fóðurmjöl etc. eftir að fyrirtæki þessi eru búin að standa í nokkurn tíma og reynsla er fengin fyrir því að þau beri sig.