20.08.1912
Efri deild: 29. fundur, 23. löggjafarþing.
Sjá dálk 84 í B-deild Alþingistíðinda. (80)

10. mál, ritsíma- og talsímakerfi Íslands

Eiríkur Briem:

Jeg vildi gera nokkra grein fyrir atkvæði mínu; jeg lít svo á, að það sje gott, að frumv. þetta verði að lögum, þar eð með því er fengin grind til að byggja á, grind sem seinna megi fylla út; mjer dettur ekki í hug, að ekki þurfi síðar að athuga það eða breyta, en það mætti gera t. d. í fjárlögum, en hins vegar mundi frumv. þetta mjög greiða fyrir meðferð málsins. Mig vantar þekking til þess að hafa rökstudda skoðun, að því, er snertir einstakar tillögur, sem fram hafa komið í þessu máli, því að það þarf að líta á þær, eigi aðeins út af fyrir sig, heldur og í sambandi við aðrar tillögur, svo að það meira nauðsynlega verði ekki látið sitja á hakanum fyrir því minna nauðsynlega, og yfir höfuð verð jeg að skoða það skakka aðferð, að vera að koma fram með slíkar tillögur fyrst á alþingi; leiðin ætti að vera sú, að þær væru fyrst sendar til stjórnarráðsins, og að stjórnarráðið rannsakaði þær í sambandi við símastjórann og gæfi síðan álit með eða móti.

Jeg hef þess vegna ætlað mjer að vera á móti öllum breytingartillögunum sem hjer liggja fyrir; þó tel jeg fyrri breytingartillöguna á þgskj. 329 sanngjarna, en síðari tillöguna tel jeg athugaverða. Það hefur verið haft á móti þeirri grundvallarreglu, að hrepparnir kosti starfsrækslu stöðvanna að meiru eða minna leyti, en jeg álít hana sjálfsagða; og í Noregi fóru ekki símarnir að bera sig, fyr en hún komst á þar. En álitamál gæti verið, hvort ekki væri rjett, að landssjóður legði til nokkurt minsta gjald, en hrepparnir borguðu það, sem kostnaðurinn færi þar fram yfir, í stað þess að miða við eitthvert hundraðsgjald eins og háttv. 1. þm. Húnvetninga (Þ. J.) talaði um; annars álít jeg, að orðalag 9. gr. megi vel standa eins og það er.