15.07.1918
Neðri deild: 71. fundur, 29. löggjafarþing.
Sjá dálk 902 í B-deild Alþingistíðinda. (900)

118. mál, dýrtíðaruppbót handa embættis- og sýslumönnum landssjóðs

Sigurður Stefánsson:

Jeg tók það fram í umr. um launahækkunarfrv., sem þessi háttv. deild afgreiddi, að jeg væri ekki samþykkur þeirri aðferð, sem væri höfð í því, og jeg verð að kalla handahófsaðferð. Taldi jeg rjettara að ganga inn á þá braut að hækka dýrtíðaruppbótina, svo sem háttv. Ed. hefir nú gert. En vegna þess að þessi háttv. deild gekk ekki inn á þá braut í öndverðu, er málið komið í það óefni, sem nú er. Það gerir ef til vill ekkert til, hvor leiðin er farin, en þeim mönnum, sem hlut eiga að máli, er gert rangt til, ef málið er látið vera í sama horfinu, sem það var, er þing kom saman. Hagur margra þeirra er svo bágborinn, að nauðsyn er á því, að þingið skilji ekki svo við málið, að hann verði ekki bættur að einhverju leyti. Því hygg jeg ekki rjett af háttv. deild að fella þetta frv.

Jeg vil þess vegna ekki leggja á móti þessu frv. háttv. Ed., þótt jeg hins vegar fái ekki dulist þess, að hún hefir beitt þessa háttv. deild nokkru harðræði. En um það er ekki að fást; sú deild er sjálfráð um, hverjum augum hún litur á málið, hvað sem skoðun þessarar deildar líður.

Jeg verð að taka undir með hæstv. forsætisráðherra, að grundvallarstefnan er rjettari í þessu frv. heldur en í hinu. Og hefði deildin gengið strax inn á þá braut, að endurskoða dýrtíðarlögin, þá horfði málið öðruvísi við.

Brtt. þeim, sem fram eru komnar, get jeg ekki greitt atkv. Þær komu fram nú fyrst á fundinum, svo að jeg hefi ekki átt kost á að átta mig á þeim. Og jeg varð þess ekki var í ræðu háttv. flm. (B. St), að hann hefði gert sjer nokkra grein fyrir því, hver áhrif þær hefðu á gjaldaliðinn, sem jeg ekki heldur lái honum. En það óefni, sem þetta mál er komið í, er ein afleiðing af samvinnuleysi þings og stjórnar. Fjárveitinganefnd þessarar háttv. deildar er vorkun, þó að hún hafi ekki gert betur. Úr öllum áttum drifu að henni bænir um launabætur og hún stóð ein síns liðs án nokkurs stuðnings stjórnarinnar. Það hefði áreiðanlega farið betur, að stjórnin hefði undirbúið málið áður en þing kom saman í þá átt, sem hæstv. forsætisráðherra taldi heppilegasta, og tekið dýrtíðaruppbótarlögin til endurskoðunar. Og því fremur hefði hæstv. stjórn átt að gera þetta, sem hún játar fúslega, að embættismenn hafi fulla þörf á og eigi fulla kröfu til frekari uppbótar.

Mig furðar ekki meir á þessu en öðru á þessu stjórnlausa þingi, þó að þetta mál fari í mola og árangurinn af þessari 13 vikna setu verði = 0. (S. S.: Bættur skaðinn). Það getur verið gott fyrir landssjóðinn, en það er hvorki skaðlaust nje vansalaust, að láta embættismenn landsins sitja við verri laun en verkamenn á mölinni.

Jeg greiði frv. atkv., en brtt. get jeg ekki greitt atkv. af því, að jeg hefi ekki haft tóm til að kynna mjer þær, hvort sem hæstv. forseti tekur þá afsökun gilda.