23.09.1919
Efri deild: 63. fundur, 31. löggjafarþing.
Sjá dálk 2493 í B-deild Alþingistíðinda. (2750)

158. mál, réttur ríkisins til vatnsorku í almenningum

Halldór Steinsson:

Það kemur mjer einkennilega fyrir að heyra úr ráðherrasæti, að landið sje nú stjórnlaust. ,,Fungerandi“ stjórn ber sömu ábyrgð og aðrar stjórnir, svo ekki er hægt að skilja þessi orð hæstv. atvinnumálaráðherra (S. J.) öðruvísi en að landið hafi verið stjórnlaust síðan núverandi stjórn settist að völdum, og sje það enn.

Þingsályktunartillöguna virðist mjer einsætt að fella. Í fossamálinu hafa komið fram tvær stefnur, önnur að ríkið eigi vatnsmagnið, hin að það sje eign landeigenda. Það hefir greinilega komið fram, að meiri hluti þingsins hallast eindregið að síðari málstaðnum. Hv. neðri deild hefir sýnt ósamkvæmni í því, að afgreiða þessa till. til þingsál., því það er enginn úrskurður til um það, að ríkið eigi afrjettirnar. En ef ríkið á ekki afrjettirnar, þá á það ekki heldur vötnin, sem um afrjettir renna, samkvæmt skoðun meiri hluta neðri deildar og alls þingsins. Nú er mjer það kunnugt, að sumar afrjettir eru eign sveitarfjelaga eða einstakra manna, og greiði jeg því atkvæði á móti tillögunni.