06.04.1927
Efri deild: 46. fundur, 39. löggjafarþing.
Sjá dálk 777 í D-deild Alþingistíðinda. (3747)

92. mál, yfirsíldarmatsstarf á Austurlandi

Fyrirspyrjandi (Ingvar Pálmason):

Það eru aðeins fáein orð út af þeirri fullyrðingu hæstv. atvrh. (MG), að hjer hafi verið sparað, án þess að það. hafi komið að sök. Það er algerlega órannsakað mál, því að það hefir annar hv. þm. (MK) bent á það, að hjer hafi orðið töluvert tjón af þessari ráðstöfun.

Jeg skal svo ekki lengja meira umr. að sinni. Jeg geri ráð fyrir, að hvorir haldi sinni skoðun. En mjer kemur það dálítið undarlega fyrir sjónir, ef sagt er, að þinghelgin sje notuð til þess að bera sakir á hæstv. stjórn. En að minni hyggju á einmitt að gera það þar. Einmitt þar getur hún borið þær sakir af sjer, og hvergi annarsstaðar betur.

Það hefir verið bent á það, að oft væri sameinuð embætti þegar svona stendur á. Jeg þekki dæmi til þess, að hjeraðslæknir hefir verið settur til að þjóna í næsta hjeraði við sitt eigið. Er það hefir altaf verið af knýjandi ástæðum og aðeins um stuttan tíma, og jafnvel hefði mátt segja af því, að ekki hefði fengist maður í stöðuna. En hjer er um alt annað að ræða en að sameina embættin í bili, því að hæstv. atvrh (MG) hefir lýst yfir því að þessi ráðstöfun eigi að standa þar til síld fer reglulega að fiskast fyrir austan, og er þá ekki gott að segja, hve mikið tjón kann að hafa hlotist af þeirri ráðstöfun.

Síðastliðið sumar fiskaðist þar um 9 þús. tunnur af síld, og auk þess allmikið, sem notað var þar fyrir austan og ef við hugsum okkur nú, að næsta sumar fiskist þar helmingi meira, þá verður manni að spyrja, hve lengi þetta á að ganga svo. Jeg hygg, að þótt hæstv. ráðh. (MG) geti máske fundið einhverja afsökun fyrir því, að þetta hefir verið látið vera svona hingað til, þá sjái hann sjer ekki fært að láta við svo búið sitja, bæði þvert ofan í skýlaus fyrirmæli síldarmatslaganna, og svo þegar litið er á þann geysimikla skaða, sem slík ráðstöfun getur bakað síldarútflytjendum á Austurlandi.