05.03.1928
Efri deild: 39. fundur, 40. löggjafarþing.
Sjá dálk 491 í C-deild Alþingistíðinda. (1817)

53. mál, friðun á laxi

Frsm. (Jón Baldvinsson):

Það kom ekkert fram í ræðu hv. fl. landsk. nema það, sem jeg bjóst við að fyrirvari hans mundi þýða.

Við hinir nefndarmenn getum ekki sjeð neina tryggingu fyrir því, að frv. um nýja laxveiðalöggjöf verði lagt fyrir næsta þing. Það mál þarf mikinn undirbúning. Jeg álít, að helstu breytingar, sem gera þarf, felist í frv. því, sem hv. þm. A.-Húnv. hefir borið hjer fram. Það verða altaf deilur um það, hvernig þessum málum eigi að vera skipað, og jeg fæ ekki sjeð, að frv. það, um fiskiræktarfjelög, sem borið er fram í hv. Nd., muni bæta úr ágöllum laxveiðilöggjafarinnar fyrst um sinn. En það er rjett hjá hv. 6. landsk., að það frv. ætti að geta aukið skilning manna í þessum efnum, og þegar það mál er búið að grípa um sig úti um sveitir landsins, þá má fyrst vænta þess, að menn fái betri skilning á þessum málum en verið hefir, og stangist ekki eins um hagsmuni þeirra, sem veiðirjett eiga ofan til og neðan til í ánum.

Ef gera ætti samþyktir um hverja á og hvert veiðivatn á landinu, eins og hv. 6. landsk. virðist vilja, og vel getur verið að væri best, þá verða það að vera kunnugir menn, sent þær reglur settu, og yrðu það því að vera hinar ýmsu sýslunefndir, sem það gerðu, en ekki Alþingi. En ekki er nú víst, að það yrði neitt rjettlátara.

Jeg hefi í raun og veru ekki fleira að segja, en vildi aðeins geta þess, að ef frv. verðursamþykt óbreytt, þá getur svo farið, að einhver veiðieigandi, sem um getur í 3. gr., misti alveg veiðirjett á jörð, sem veiðirjett ætti, t. d. 200–300 metra frá árósum. En það er eins og gengur og gerist, að ómögulegt er að koma á umbótum, nema einhver líði baga við. En ef þeir, sem skaða bíða, eru aðeins fáir, en allur almenningur hefir hagnað af, þá álít jeg rjett að koma umbótum á, og þá t. d. að samþ. þetta frv., og horfa ekki í það, þótt hlunnindi kunni að verða tekin af einhverjum einstökum mönnum, ef almennara rjettlæti næst.