29.02.1928
Neðri deild: 35. fundur, 40. löggjafarþing.
Sjá dálk 1576 í B-deild Alþingistíðinda. (640)

25. mál, kynbætur nautgripa

Halldór Stefánsson:

Háttv. frsm. (LH) og hæstv. atvmrh. (TrÞ) geta ekki fallist á rjettmæti dagskrártill. minnar og þykir til svo mikils að vinna, eins og háttv. frsm. orðaði það, að ekki megi fresta þessari löggjöf. Og á líkan hátt fjellu orð hæstv. atvmrh.

Jeg hefi vikið að því áður, hver árangur hefir orðið af þessari starfsemi hjá nautgriparæktarfjelögunum. Og þótt jeg neiti því ekki, að hann kunni einhver að vera, þá er hann afarlítill á svo löngum tíma, sem um er að gera. Hitt er jafnvíst, að bændur margir hverjir vinna að þessum árangri hver fyrir sig og komast lengra en þessi fjelagsskapur. Þetta, um lítinn árangur kynbótastarfseminnar, stafar af þeim örðugleikum, sem eru á því að halda uppi og starfrækja slíkan fjelagsskap hjer í strjálbýlinu.

Jeg hefi ekkert sagt um það, að jeg kynni ekki að fallast á slík lög sem þessi síðar meir, er jeg teldi þau nægilega og rjettilega undirbúin. Hæstv. atvmrh. heldur því fram, að málið sje komið frá rjettum aðiljum, með því að frv. er samið af 2 ráðunautum Búnaðarfjelags Íslands. Jeg get ekki talið, að svo sje. Þeir rjettu aðiljar þessa máls eru bændur landsins. Jeg álít, að áður en til samþyktar slíkrar löggjafar komi, þurfi að fá álit þeirra á því fyrirkomulagi, sem á að lögleiða.

Jeg get vel trúað, að vel sje um hnútana búið á grundvelli frv. En það er þetta, sem fyrir mjer vakir, að jeg sje ekkert, sem rekur á eftir að samþykkja þetta frv. nú, áður en bændur hafa átt kost á að kynna sjer grundvöll þess og láta uppi sitt álit og sínar óskir.