14.03.1930
Neðri deild: 53. fundur, 42. löggjafarþing.
Sjá dálk 697 í C-deild Alþingistíðinda. (1310)

104. mál, hafnargerð á Akranesi

Frsm. minni hl. (Ólafur Thors):

Ég get tekið undir með hv. frsm. meiri hl., að ekki sé ástæða til að hefja langar umr. um þetta mál, því að það horfir að flestu leyti eins við og þau önnur hafnarmál, sem hafa verið rædd hér í dag og samþ.

Það er enginn ágreiningur um það innan n., að full þörf sé fyrir hafnargerð á Akranesi, og þarf ég því ekki að rökstyðja hér þá þörf. Ágreiningurinn er aðeins um framlag og ábyrgð ríkissjóðs; en ég geri ráð fyrir, að flestir hv. dm. muni geta samþ. það með mér, að úr því að búið er að taka ákvarðanir um hafnargerðir á Sauðárkróki og Dalvík, sé þar með slegið föstu, að sama regla eigi að gilda um hafnargerð á Akranesi. Ég vil þó leiða athygli manna að því, að það, sem farið er fram á um Akranes, er minna en það, sem samþ. var um hafnargerðir á Sauðárkróki og Dalvík; því að þótt farið sé fram á sama tillag úr ríkissjóði, er ábyrgð ríkissjóðs minni, nefnilega aðeins fyrir 5/12 hlutum af þeirri upphæð, sem áætlað er, að mannvirkið kosti, í stað 3/5, sem samþ. hefir verið hér í deildinni um Sauðárkrók og Dalvík. Þetta munar því, að ábyrgð ríkissjóðs fyrir Akranesshöfn verður aðeins 500 þús. kr., í stað þess að hún yrði annars 720 þús. kr. Ég legg nú ekki mikið upp úr þessu, því að ég býst ekki við, að það baki ríkissjóði neina áhættu. En þeir, sem bera kvíðboga fyrir, að ríkissjóður bíði halla af þessu, ættu því fremur að geta fellt sig við þetta frv., þar sem ábyrgðin er minni.

Ég skal nú ekki orðlengja þetta frekar. Þess vil ég þó geta, að mér þætti vænst um, ef hv. þm. V.-Húnv. tæki nú ekki til máls. Hann hefir nú haldið sömu ræðuna í báðum hafnarmálunum, sem búið er að ræða hér, og fengið sömu andsvör. Hann barðist einn gegn 8 og féll fyrir hverjum einum.