14.04.1930
Efri deild: 77. fundur, 42. löggjafarþing.
Sjá dálk 2174 í B-deild Alþingistíðinda. (2898)

132. mál, Fiskveiðasjóður Íslands

Frsm. (Erlingur Friðjónsson):

Sjútvn. hefir fallizt á að leggja til, að frv. þetta verði samþ. óbreytt. Einn nm. hefir þó skrifað undir með fyrirvara, sem hann væntanlega gerir grein fyrir, því. engar brtt. hafa komið fram frá honum.

Frv. þetta tók allmiklum breyt. í Nd. frá því formi, sem það var í þegar það var borið fram í Nd. Var þá gert ráð fyrir því, að í sambandi við þennan sjóð starfaði rekstrarlánadeild. En Nd. felldi hana niður, og stendur þá aðeins eftir hin deildin, sem á að lána til skipakaupa og iðnstofnana í sambandi við sjávarútveg.

N. er sammála um það, að það séu spjöll á frv., að rekstrarlánadeildin var tekin út úr. En af því svo mjög er liðið á þingtímann, þá vildi n. ekki gera till. um það, að rekstrarlánadeildin yrði sett inn aftur. Þá þykir n. líka fulllangt gengið að hækka smálestatölu þeirra skipa, sem lánað er út á, upp í 50 smál. Þessum sjóði er fyrst og fremst ætlað að lána út á smærri báta, sem eru undir 30–35 smál. — Það hefir einnig verið gerð sú efnisbreyt. á frv., að eftir frv. nú er heimilt að leggja ¼% á lánin, og er þeim ætlað að renna í sérstakan sjóð, sem á að standa undir þeim töpum, sem verða kunna á lánum þessum fyrir þá sök, að sjóveð hvílir á skipunum. Þetta er mikils virði vegna þess, að það miðar að því að gera lánin hættuminni og öruggari.

Ég sé svo ekki ástæðu til að fara fleiri orðum um frv. og mun því ekki gera það, nema mér sé gefin sérstök ástæða til þess í umr. um málið.