03.04.1930
Neðri deild: 70. fundur, 42. löggjafarþing.
Sjá dálk 2350 í B-deild Alþingistíðinda. (3151)

32. mál, vegalög

Bernharð Stefánsson:

Ég skal fara að dæmi hv. 2. þm. G.-K. og tala stutt, og skal ég því strax taka það fram, að þótt ég bæri fremur lítið traust til hv. samgmn. í fyrstu, er mér ánægja að kannast við, að hv. n. hefir í þetta sinn starfað forsvaranlega að málinu og skilað áliti svo tímanlega, að von er um, að málið komist í gegnum þingið og nái fullnaðarafgreiðslu.

Hv. nefnd hefir orðið við ýmsum þeim kröfum, sem þm. hafa gert, og er það meira en vænta mátti eftir fyrri reynslu. Ég hefi á nokkrum undanförnum þingum flutt þá brtt., sem ég flyt nú og er þess efnis, að aftan við C. 3. í 2. gr. komi nýr liður, nefnilega Eyjafjarðarbraut frá Akureyri að Saurbæ.

Ég hefi fært rök fyrir því á undanförnum þingum, að þessi krafa á fullan rétt á sér, enda má líta svo á, að 1923 hafi þingið gefið það loforð, að þessi braut skuli tekin í þjóðvegatölu.

Nú er mér ánægja að sjá, að hv. nefnd hefir þó að nokkru leyti tekið þessa kröfu til greina og leggur til, að vegurinn frá Akureyri að Kristnesi verði tekinn í þjóðvegatölu. Raunar byggir hún þessa till. sína á nokkuð öðrum forsendum en ég hefi gert, nefnil. loforði Alþingis 1923; forsendur hennar eru þörf hælisins, og er það út af fyrir sig sjálfsagt mál, að ríkinu beri skylda til að taka að sér þennan veg. Það nær auðvitað ekki nokkurri átt, að ríkið sjái ekki fyrir vegi að þessu heilsuhæli eins og að öðrum samskonar stofnunum. Er það góðra gjalda vert, að hv. n. hefir viðurkennt þetta, og skal ég taka það fram, að ef mér hefði fundizt fullt samræmi í till. hv. n., hefði ég sætt mig við þessa úrlausn, þótt þessi vegur sé ekki nema 1/3 hluti af þeim vegi, sem ég fór fram á, að gerður væri að þjóðvegi. Ég hefði sætt mig við þetta, ef nefndin hefði ekki lagt til, að vegir, sem virðast ekki rétthærri en Eyjafjarðarbraut, verði teknir í þjóðvegatölu. Þar sem n. segir, að þarna sé um innanhéraðsveg að ræða, þá er það rétt, að vegurinn frá Kristnesi fram Eyjafjörð má teljast það, en frá Akureyri að Kristnesi ekki. Annars er það nú svo, að allmargir innanhéraðsvegir eru nú þegar taldir til þjóðvega, t. d. Biskupstungnabraut, og hv. n. leggur líka til, að nokkrir slíkir vegir verði teknir í tölu þjóðvega, eins og t. d. Skeiðabraut og Landbraut, sem báðar eru innansveitavegir. Sé ég ekki, hvers vegna þær brautir eiga að vera rétthærri en Eyjafjarðarbraut. Af þessum ástæðum álít ég ekki rétt að taka brtt. aftur, eins og ég raunar hafði ætlað mér, en þó getur verið, að ég geri það, ef atkvgr. fellur þannig, að samræmi fáist, en ef t. d. Landbraut verður samþ., þá sé ég ekki annað en þessi till. mín eigi fullan rétt á sér. Þó vil ég taka það fram, að ég er ánægðari með till. n. heldur en að engin breyt. fáist.

Þá er ég meðflm. að annari till., um að taka veginn frá Siglufirði að Fljótaárbrú upp í tölu þjóðvega, en þar sem ég geri ráð fyrir, að 1. flm. mæli fyrir henni, sé ég ekki ástæðu til að orðlengja þetta frekar.