25.10.1934
Neðri deild: 19. fundur, 48. löggjafarþing.
Sjá dálk 1924 í B-deild Alþingistíðinda. (2041)

73. mál, stjórn og starfræksla póst- og símamála

Gísli Sveinsson:

Herra forseti! Um þetta frv. gildir það sama og um bílafrv., að samgmn. hefir gert stj. þann greiða að koma því inn í þingið. Þó hafa einstakir nm. ekki bundið sig við það að fylgja frv. — Það er ósk n., að enda þótt frv. verði ekki vísað aftur formlega til hennar, þá fái hún þó að hafa það áfram til meðferðar, og að það verði ekki tekið fyrir fyrr en n. gerir aðvart um, að hún sé tilbúin. Mitt sjónarmið er það, að enn minni þörf sé á þessu frv. en bílafrv. Það er vitað, að í 3. gr. l. frá 1929 er veitt heimild til þess að undirbúa sameiningu síma og pósts, þar sem slíkt sé hægt. Ég álít, að þetta sé alveg fullgild heimild, enda hefir hún verið skilin svo, og sameining þessara stofnana látin fara fram á ýmsum stöðum, þar sem hentugt þótti að gera þær ráðstafanir. En það er alveg ósannað mál, að sameining verði yfirleitt til sparnaðar. Á nokkrum stöðum yrði að reisa ný hús til þess að sameining gæti farið fram. Það er kannske símaafgreiðsla á stað, þar sem ekkert húsrúm er fyrir póstafgreiðslu, og öfugt. Ef ætti að sameina þessar stofnanir alstaðar, án tillits til aðstæðna, yrði þar af allverulegur kostnaður fyrir ríkissjóð. Annars býst ég við, að n. taki þetta atriði til athugunar og slái þarna varnagla, ef þörf þykir. Aðalatriði frv. liggur í sameiningu yfirstjórnar póst- og símamála hér í Rvík. En eins og póstmálastjóri hefir bent á í bréfi sínu, mundi það hvorki kosta meira eða minna en að byggja nýtt pósthús. Það er vafalaust hægt að nota pósthúsið í nokkur ár enn, og þá væntanlega líka póstmálastjórann. Auðvitað er ekki meiri nauðsyn á þessari sameiningu nú en undanfarin ár, en í frv. þessu kemur fram löngun stj. til þess að brölta sem mest og breyta því, sem hægt er. Að vísu ætti slíkt ekki að vera hlutverk neinnar landsstj., né heldur þm. En hin svokallaða skipulagsn. hefir víst samkv. stefnu sinni ekki séð sér annað fært en að róta þessu máli inn á þingið eins og öðrum, sem hún hefir verið að unga út. Því þótt henni væri það starfsfall ekki skylt, þá hefir n. talið hentugt að koma með þetta mál nú, þó að það sé í rauninni gamalt mál hér á Alþingi. Ég tek það fram við umr. um þetta mál, eins og málið, sem síðast kom frá henni (bílafrv.), að ég tel það ekki heyra undir þessa n. samkv. erindisbréfi hennar, að róta inn í þingið gömlum frv. og órannsökuðum málum. Hitt var henni fyrirlagt, að rannsaka og undirbúa rækilega ný mál.