03.03.1936
Neðri deild: 14. fundur, 50. löggjafarþing.
Sjá dálk 688 í B-deild Alþingistíðinda. (1015)

8. mál, fóðurtryggingarsjóðir

*Emil Jónsson:

Það eru aðeins nokkur orð út af samanburði hv. 2. þm. N.-M. á atvinnuleysistryggingarsjóðunum og þessum fóðurtryggingarsjóðum, sem ég veit, að hann hefir gert gegn betri vitund. Hann sagði, að samræmi væri milli framlaga ríkissjóðs til atvinnuleysissjóðanna og fóðurtryggingarsjóðanna. Til fóðurtrygginganna leggur ríkið fram helming á móti hinum tryggðu, en til atvinnuleysistrygginganna leggja ríkissjóður og bæjarsjóðir samanlagt helming á móti hinum tryggðu. Í síðara tilfellinu leggja þannig hinir tryggðu fram helmingi meira en ríkið; framhjá því getur hv. þm. ekki komizt. Það vill nú svo til, að gert er ráð fyrir, að ríkið leggi sömu upphæð til þessara sjóða. Framlög þess til atvinnuleysissjóðanna mega ekki fara fram úr 6 kr. á mann, og eftir útreikningum hv. þm. sjálfs sýnir það sig, að framlagið til fóðurtryggingarsjóðanna mun nema um 6 kr. á meðalbú, eða hér um bil því sama. En að halda fram, að það sé sama, hvort ríkið og bæjarfélögin leggja fram einhverja upphæð, eða hvort ríkið eitt leggi hana fram, það veit hv. þm., að er fullkomlega rangt. Vilji hann halda því fram í alvöru, vildi ég gjarnan, að ríkið legði fram t. d. hluta míns bæjarfélags til atvinnuleysistrygginganna. Ef hv. þm. vill halda fram, að framlögin til þessara tveggja tegunda sjóða séu sambærileg, vil ég bjóða honum upp á að gera það samræmi fullkomið, þannig að í báðum tilfellum greiði þeir tryggðu sjálfir á móti framlagi ríkisins og sveitar- og bæjarfélaga til samans. Hreppssjóðirnir koma þá bara inn og greiða sama tillag í fóðurtryggingarsjóðina eins og ríkið. Ef hv. þm. lýsir því yfir, að hann vilji ganga inn á þá leið, mun ég draga brtt. mína til baka og koma með till. í þá átt við 3. umr.