28.03.1936
Neðri deild: 36. fundur, 50. löggjafarþing.
Sjá dálk 421 í C-deild Alþingistíðinda. (2713)

95. mál, sveitarstjórnarlög

Páll Zóphóníasson:

Herra forseti! Ég vil reyna að taka dæmi til að útskýra þetta mál. Sýslusjóðsgjald í Árnessýslu mun vera 42 þús. kr. Því er jafnað á hreppana eftir þrem skattstofnum eða niðurjöfnunarstofnum, fólksfjölda, tekjum og skattmati fasteigna. Á skattmat fasteigna kemur því 14 þús. kr. Fasteignamatt allra sumarbústaða í Árnessýslu er nú sem næst 1/10, af öllu fasteignamati, og eru því 1400 kr. af sýslusjóðsgjaldinu í raun og veru jafnaðar niður á sumarbústaðina. Væri þessu nú hætt, og því gerir frv. það ráð fyrir, sem hér liggur fyrir, þá mundi sá hluti af sýslusjóðsgjaldinu, sem nú er raunverulega lagður á þá, koma á hinar fasteignirnar.

Hvort rétt er að samþ. frv., virðist mér fara eftir því, hvort þau sameiginlegu gjöld, sem sýslusjóðirnir þurfa að standa undir, eru til orðin vegna þeirra manna, sem í sumarbústöðunum búa, eða eingöngu vegna hinna sýslubúanna. Ég verð að segja, að mér eru ekki svo ljósar, a. m. k. ekki í augnablikinu, allar þarfir sýslusjóðs og að hvaða leyti þær standa í sambandi við sumarbústaðina og þá, sem í þeim búa, að ég treysti mér til að fella úrskurð um, hvort rétt sé að láta þá taka þátt í sameiginlegum kostnaði við sýsluþarfir. Ég get búizt við, að það sé að einhverju leyti, og því ekki rétt að fella þann gjaldstofn alveg burtu. Fyrir þessa sýslu mundi sem sagt hækkunin á íbúa hreppanna nema 1400 kr. Það er líklega önnur sýsla hér, sem hefir meira af sumarbústöðum en Árnessýsla. Svo er náttúrlega fjöldinn allur af sýslum, sem þetta snertir ekki neitt. Ég vildi með þessum orðum benda á, hvernig þetta verkaði í þeim sýslum, sem mest er um sumarbústaði í, og ég vil jafnframt biðja menn, sem þessu eru kunnugri en ég, að athuga, hvort þessar sameiginlegu þarfir, sem sýslusjóðir eru notaðir til, séu ekki að einhverju leyti til orðnar vegna þeirra manna, sem í sumarbústöðunum búa, eins og annara manna, sem í sýslunni eru lengri eða skemmri tíma.